ប្រមុខសិទ្ធិមនុស្សអង្គការសហប្រជាជាតិ បាននិយាយកាលពីថ្ងៃអង្គារថា យ៉ាងហោចណាស់រដ្ឋ និងដែនដីចំនួន ៥៨ ត្រូវបានបំពុលដោយមីនប្រឆាំងមនុស្ស ដោយមានអ្នកស្លាប់ និងរបួសយ៉ាងច្រើន នៅក្នុងប្រទេសមីយ៉ាន់ម៉ា ស៊ីរី អាហ្វហ្គានីស្ថាន និងអ៊ុយក្រែន។

លោក Volker Turk បាននិយាយនៅក្នុងសេចក្តីថ្លែងការណ៍មួយថា៖«នេះគឺជារឿងគួរឲ្យព្រួយបារម្ភយ៉ាងខ្លាំង ដែលជិត ៣០ ឆ្នាំ ចាប់តាំងពីសន្ធិសញ្ញាហាមឃាត់មីនប្រឆាំងមនុស្ស ត្រូវបានអនុម័ត អាវុធផ្ទុះទាំងនេះ នៅតែបន្តសម្លាប់ និងបង្ករបួសដល់មនុស្ស ជារឿយៗរាប់ទសវត្សរ៍បន្ទាប់ពីពួកវា ត្រូវបានគេដាក់»។

«ដូច្នេះវាពិតជាមានសារៈសំខាន់ណាស់ដែលរដ្ឋទាំងអស់ត្រូវប្តេជ្ញាចិត្តឡើងវិញ ក្នុងការបញ្ចប់ការផលិត ការប្រើប្រាស់ និងការបញ្ជូនអាវុធទាំងនេះ និងបង្កើនកិច្ចខិតខំប្រឹងប្រែងរបស់ពួកគេទ្វេដង ដើម្បីសហការក្នុងការសម្អាតមីនដែលដាក់រួចហើយ»។

លោក Turk បានធ្វើរបាយការណ៍មួយស្តីពីស្ថានភាពនេះ ដោយទាញយកព័ត៌មានពីរដ្ឋាភិបាល អង្គការមិនមែនរដ្ឋាភិបាល អង្គការមនុស្សធម៌ និងសង្គមស៊ីវិល។

យ៉ាងហោចណាស់មនុស្ស ៩៤៥ នាក់ ត្រូវបានសម្លាប់ និង ៤.៣២៥ នាក់ រងរបួស ដោយសារគ្រាប់មីន និងសំណល់ជាតិផ្ទុះពីសង្គ្រាម ក្នុងឆ្នាំ ២០២៤។ នេះបើយោងតាមការលើកឡើងរបស់ក្រុមឃ្លាំមើលគ្រាប់មីន និងគ្រាប់បែកចង្កោម (Landmine and Cluster Munition Monitor)៕