ប្រធានាធិបតីលីបង់ លោក Joseph Aoun បាននិយាយនៅថ្ងៃពុធ (ទី១៧ ខែមិថុនា ឆ្នាំ២០២៦) នេះថា ប្រទេសរបស់លោក កំពុងបន្តវិធីសាស្រ្តឯករាជ្យផ្ទាល់ខ្លួន ក្នុងការចរចាដែលកំពុងដំណើរការ ដោយសង្កត់ធ្ងន់ថា ការដោះស្រាយណាមួយ នឹងត្រូវសម្រេចបានតាមរយៈរដ្ឋលីបង់ មិនមែនដោយខាតបង់របស់ប្រទេសនោះឡើយ។
ខណៈពេលកំពុងទទួលគណៈប្រតិភូថ្នាក់ដឹកនាំសាសនាជាន់ខ្ពស់នៃវិហារកាតូលិក Maronite មកពីក្រៅប្រទេស លោក Aoun បាននិយាយថា៖ «ការធានាដែលយើងទទួលបាន និងអ្វីដែលយើងទទូច គឺថា លីបង់មានផ្លូវឯករាជ្យផ្ទាល់ខ្លួន ក្នុងដំណើរការចរចា»។
យោងតាមសេចក្តីថ្លែងការណ៍មួយពីការិយាល័យប្រធានាធិបតីលីបង់ លោកបានបន្តថា ទីក្រុងបេរូត «ពិតជាគាំទ្របទឈប់បាញ់ និងប្រទេសណាមួយដែលជួយយើង ក្នុងនោះរួមទាំងអ៊ីរ៉ង់ផងដែរ»។
លោក Aoun បានបន្ថែមថា៖ «រដ្ឋលីបង់កំពុងធ្វើការចរចា ហើយប្រទេសនេះមានអធិបតេយ្យភាព ក្នុងការសម្រេចចិត្តរបស់ខ្លួន។ គ្មាននរណាម្នាក់ជំនួសតំណែងរបស់ប្រទេសនេះបានឡើយ ហើយការដោះស្រាយណាមួយ នឹងធ្វើឡើងតាមរយៈប្រទេសលីបង់ មិនមែនដោយការខាតបង់របស់ប្រទេសនោះទេ»។
គួរបញ្ជាក់ថា បើយោងតាមតួលេខផ្លូវការ បានឲ្យដឹងថា សង្គ្រាមរបស់អ៊ីស្រាអែលដែលបានចាប់ផ្ដើមលើប្រទេសលីបង់ចាប់តាំងពីថ្ងៃទី២ ខែមីនា បានបណ្តាលឲ្យមនុស្សរាប់ពាន់នាក់ស្លាប់ និងរបួស និងជាង ១លាននាក់ត្រូវបានផ្លាស់ទីលំនៅ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
