ការវាយប្រហារតាមអាកាសរបស់អ៊ីស្រាអែលបានបន្តកំណត់គោលដៅលើទីក្រុងនានានៅភាគខាងត្បូងប្រទេសលីបង់ មុនកិច្ចព្រមព្រៀងរវាងសហរដ្ឋអាមេរិក និងអ៊ីរ៉ង់ ត្រូវចុះហត្ថលេខាជាផ្លូវការនៅថ្ងៃព្រហស្បតិ៍នេះដើម្បីបញ្ចប់សង្គ្រាមនៅគ្រប់ទិសទីក៏ដោយ។

ទីភ្នាក់ងារសារព័ត៌មានជាតិរដ្ឋលីបង់បាននិយាយកាលពីថ្ងៃពុធ ១៧មិថុនាសប្ដាហ៍នេះថាយានដ្រូន របស់អ៊ីស្រាអែលបានបើកការវាយប្រហារចំនួនបីលើកនៅក្នុងទីក្រុង Tyre ដែលបណ្តាលឱ្យមានអ្នករងរបួស ខណៈយានដ្រូនមួយគ្រឿងទៀត ក៏បានកំណត់គោលដៅទៅលើស្រុក Bint Jbeil ក្នុងទីក្រុង Nabatieh ផងដែរ។

ការប្រយុទ្ធគ្នានៅក្នុងប្រទេសលីបង់ត្រូវបានចាត់ទុកថាជាការគំរាមកំហែងដ៏ធំបំផុតមួយចំពោះកិច្ចព្រមព្រៀងគោលក្នុងសង្គ្រាមរវាងអាមេរិក និងអ៊ីស្រាអែលលើអ៊ីរ៉ង់ ដោយទីក្រុងតេអេរ៉ង់បានព្រមានថា ការវាយប្រហារថ្មីរបស់អ៊ីស្រាអែលលើលីបង់ និងការបន្តកាន់កាប់ទឹកដីរបស់ខ្លួននឹងត្រូវបានចាត់ទុកថាជាការរំលោភលើកិច្ចព្រមព្រៀង។

កាលពីថ្ងៃពុធដដែល ក្រុមអ្នកឆ្លើយឆ្លងព័ត៌មាន Al Jazeera នៅលើតំបន់នោះបានរាយការណ៍ថា កងកម្លាំងអ៊ីស្រាអែលបានបើកការវាយប្រហារតាមអាកាសនៅជាយក្រុង Kfar Tebnit ដែលក៏ស្ថិតនៅក្នុងស្រុក Nabatieh ផងដែរ។ ពួកគេក៏បានបើកការវាយឆ្មក់លើទីក្រុង Nabatieh al-Fawqa និងបានបាញ់ផ្លោងទៅលើតំបន់ខ្ពង់រាប Ali al-Taher និងជាយក្រុងនោះផងដែរ។

មួយថ្ងៃមុននេះ ការវាយប្រហាររបស់អ៊ីស្រាអែលបានសម្លាប់មនុស្សយ៉ាងហោចណាស់បួននាក់នៅតំបន់ Nabatieh រួមទាំងការវាយប្រហារដោយយានដ្រូនលើយានយន្តជាច្រើនគ្រឿងទៀតផង។

ទន្ទឹមនឹងនេះ យុទ្ធជនក្រុមប្រដាប់អាវុធហេសបូឡាបានបាញ់រ៉ូកែតយ៉ាងហោចណាស់ ១០ គ្រាប់ទៅលើកងកម្លាំងអ៊ីស្រាអែលនៅជិតទីក្រុង Kfar Tebnit។ ក្រោយមកនៅថ្ងៃពុធ កងទ័ពអ៊ីស្រាអែលបាននិយាយថា យានដ្រូនរបស់ក្រុមហេសបូឡាបានបំផ្ទុះនៅជិតកងទ័ពរបស់ខ្លួន កំពុងឈរជើងនៅភាគខាងត្បូងប្រទេសលីបង់ ដោយធ្វើឱ្យទាហានបួននាក់រងរបួស៕