សមាជិកសភាម្នាក់ បាននិយាយកាលពីថ្ងៃពុធថា យ៉ាងហោចណាស់មនុស្ស ៩ នាក់ បានស្លាប់ និង ១១ នាក់ ផ្សេងទៀត រងរបួស នៅពេលដែលក្រុមខ្មាន់កាំភ្លើងមិនស្គាល់អត្តសញ្ញាណមួយក្រុម បានវាយប្រហារសហគមន៍មួយ នៅក្នុងរដ្ឋ Kaduna ភាគខាងជើងប្រទេសនីហ្សេរីយ៉ា។

លោក Sunday Katung ដែលតំណាងឲ្យរដ្ឋ Kaduna ខាងត្បូងនៅរដ្ឋសភា បាននិយាយកាលពីថ្ងៃពុធថា ក្រុមអ្នកវាយប្រហារ បានកំណត់គោលដៅ និងបើកការបាញ់ប្រហារលើមនុស្សមួយចំនួន ដែលកំពុងកាន់ទុក្ខសាច់ញាតិដែលបានស្លាប់នៅក្នុងសហគមន៍ Ungwan Magaji នៃតំបន់រដ្ឋាភិបាលមូលដ្ឋាន Kauru របស់រដ្ឋនេះ កាលពីយប់ថ្ងៃអង្គារ។

មន្ត្រីរូបនេះបានពិពណ៌នាអំពីការវាយប្រហារនេះថា «អមនុស្សធម៌ និងមិនអាចទទួលយកបាន» ដោយនិយាយថា ខ្មាន់កាំភ្លើងបានរត់ចូលទៅលាក់ខ្លួនក្នុងគុម្ពោតព្រៃក្បែរនោះ បន្ទាប់ពីទង្វើដ៏អាក្រក់នេះ។

លោកបានបន្ថែមថា មូលហេតុនៃការវាយប្រហារនេះ មិនទាន់ដឹងនៅឡើយទេ ដោយជំរុញឲ្យភ្នាក់ងារសន្តិសុខតាមស្វែងរកចាប់ខ្លួនខ្មាន់កាំភ្លើងទាំងនោះ៕