អ៊ុយក្រែន៖ កងទ័ពរុស្ស៊ីពេលនេះកំពុងផ្តោតលើកិច្ចខិតខំប្រឹងប្រែងរបស់ពួកគេ លើការគ្រប់គ្រងតំបន់ភាគខាងកើតអ៊ុយក្រែន ប៉ុន្តែការរុលទៅមុខបានជាប់គាំងដោយសារតែការវាយទប់ទល់របស់កងកម្លាំងអ៊ុយក្រែន។ ក្រសួងការពារជាតិរុស្ស៊ីបាននិយាយថា កងកម្លាំងរបស់ខ្លួនបានវាយប្រហារដោយមីស៊ីល ទៅលើមូលដ្ឋានយោធាអ៊ុយក្រែននៅតំបន់ភាគខាងកើតទីក្រុង Kharkiv ដោយបានបំផ្លាញឃ្លាំងគ្រាប់រំសេវ និងគោលដៅផ្សេងៗទៀត។
ក្រសួងបានប្រកាសថា យោធាបានបាញ់ទម្លាក់យានដ្រូនរបស់អ៊ុយក្រែនចំនួន ១៣គ្រឿងនៅក្នុងទីក្រុង Kharkiv និងទីក្រុង Kherson នៅភាគខាងត្បូង។ យោធារុស្ស៊ីហាក់ដូចជាកំពុងប្រមូលផ្តុំកម្លាំងទ័ពជើងគោករបស់ខ្លួន ដើម្បីដណ្ដើមយកតំបន់ភាគខាងកើត Donetsk និង Luhansk បន្ទាប់ពីអះអាងថា ខ្លួនបានគ្រប់គ្រងទាំងស្រុងលើទីក្រុង Mariupol។ សេចក្ដីថ្លែងការណ៍របស់ក្រសួងការពារជាតិអង់គ្លេសនិយាយថា ការការពាររបស់អ៊ុយក្រែនលើទីក្រុង Mariupol បានធ្វើឲ្យកងកម្លាំងអង្គភាពរុស្ស៊ីជាច្រើនចុះខ្សោយ និងកាត់បន្ថយប្រសិទ្ធភាពប្រយុទ្ធរបស់ពួកគេ។ ក្រសួងការពារជាតិអង់គ្លេសនិយាយថា រុស្ស៊ីរុលទៅមុខបានតិចតួចនៅក្នុងតំបន់មួយចំនួន ចាប់តាំងពីការផ្លាស់ប្ដូរការផ្ដោតគោលដៅរបស់ខ្លួនទៅរកការកាន់កាប់ពេញលេញតំបន់ Donbas ភាគខាងកើត៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
