មន្ត្រីជាន់ខ្ពស់អាមេរិក បានប្រាប់អ្នកសារព័ត៌មាន កាលពីថ្ងៃពុធ (ទី១៧ ខែមិថុនា ឆ្នាំ២០២៦) ថា ការ​ធ្វើ​សម្បទានរបស់​ប្រទេសអ៊ីរ៉ង់ នៅក្នុងអនុស្សរណៈនៃការយោគយល់គ្នា (MOU) ដែលចុះហត្ថលេខាដោយប្រធានាធិបតី លោក​ Donald Trump គឺជាជ័យជម្នះ «ដ៏ធំ​» សម្រាប់សហរដ្ឋអាមេរិក។

អំឡុង​ពេល​និយាយតាម​ទូរស័ព្ទជាមួយអ្នកសារព័ត៌មាន ក្នុងលក្ខខណ្ឌមិនបញ្ចេញឈ្មោះ មន្ត្រីជាន់ខ្ពស់ ២រូប បានគូសបញ្ជាក់ពីកិច្ចព្រមព្រៀង ១៤ចំណុច ហើយបានអានម្ដង​មួយ​ពាក្យៗ។

មន្ត្រីទី១ បាននិយាយថា ចំណុចមួយ ក្នុងចំណោមចំណុចដែលបានព្រមព្រៀងគ្នា បង្កើតស្តង់ដារអប្បបរមាសម្រាប់សារធាតុអ៊ុយរ៉ានី​ញ៉ូមចម្រាញ់ហើយ​របស់អ៊ីរ៉ង់ ដើម្បីពង្រាវ​វា​ឲ្យ​ដល់​កម្រិត​ទាប​បំផុត​។ មន្ត្រីរូបនេះបានបន្ថែមថា៖ «ពួក​គេនិយាយ​ថា យើងនឹងបំផ្លាញស្តុកអ៊ុយរ៉ានីញ៉ូម​ចម្រាញ់ហើយ​ ហើយនេះជាវិធី​ដែលយើងនឹងធ្វើ យ៉ាងហោចណាស់ដល់​កម្រិត​ទាប​បំផុត​»។

ជាមួយ​គ្នា​នេះ មន្ត្រីទាំង២ ក៏បានជំទាស់​ផង​ដែរ ចំពោះ​​ការរិះគន់ពីគ្រប់ភាគីទាំងអស់ ដែល​រួមមាន​ពី​អ៊ីស្រាអែល សមាជិកគណបក្ស​សាធារណរដ្ឋមួយចំនួន នៅទីក្រុងវ៉ាស៊ីនតោន និងអ្នកគាំទ្រអភិរក្សនិយមថ្មីរបស់លោក​ Trump។

មន្ត្រីទី១ បាននិយាយថា សារព័ត៌មានអ៊ីរ៉ង់ និងអ៊ីស្រាអែល បានបំភ្លៃ ឬយល់ច្រឡំ អំពីកិច្ចព្រមព្រៀងនេះ។ ទាក់ទងនឹងការរិះគន់របស់អ៊ីស្រាអែល មន្ត្រីទី២ បានបញ្ជាក់​ថា «គ្មានអ្វីត្រូវបានស្នើសុំពីយើងទេ» ដោយ​នេះ​គឺ​ជា​ការ​ឆ្លើយតបទៅនឹងរបាយការណ៍ ដែលថា ទីក្រុងវ៉ាស៊ីនតោន បានបដិសេធសំណើរបស់អ៊ីស្រាអែល ក្នុងការសុំ​មើល MOU៕