ប្រទេសចិន នៅថ្ងៃព្រហស្បតិ៍ (ទី១៨ ខែមិថុនា ឆ្នាំ២០២៦) នេះ បានជំរុញឲ្យ​ទីក្រុងវ៉ាស៊ីនតោន និងតេអេរ៉ង់ «ប្រកាន់ខ្ជាប់​នូវ​ស្មារតី» នៃអនុស្សរណៈយោគយល់គ្នាអ៊ីស្លាម៉ាបាដ (Islamabad MOU) ដែលចុះហត្ថលេខាដោយប្រធានាធិបតីសហរដ្ឋអាមេរិក លោក​ Donald Trump និងប្រធានាធិបតីអ៊ីរ៉ង់ លោក Masoud Pezeshkian។

អ្នកនាំពាក្យក្រសួងការបរទេសចិន លោក Lin Jian បានប្រាប់អ្នកសារព័ត៌មាននៅទីក្រុងប៉េកាំងថា ការចុះហត្ថលេខាលើកិច្ចព្រមព្រៀងដំណាក់កាលទី១ រវាងសហរដ្ឋអាមេរិក និងអ៊ីរ៉ង់ មាន «សារៈសំខាន់ជាវិជ្ជមាន សម្រាប់ការបន្ធូរបន្ថយភាពតានតឹង និងពង្រឹងសន្ទុះ សម្រាប់បទ​ឈប់បាញ់»។

ប្រទេសប៉ាគីស្ថាន ដែលបានសម្របសម្រួលរវាងភាគីមាន​សង្គ្រាមជាមួយ​គ្នា​ទាំង២ ចាប់តាំងពីថ្ងៃទី៨ ខែមេសា ពោល​គឺ​ប៉ុន្មានសប្តាហ៍បន្ទាប់ពីសហរដ្ឋអាមេរិក និងអ៊ីស្រាអែល បានចាប់​ផ្តើមវាយប្រហារអ៊ីរ៉ង់ បាន​ឲ្យដឹង​ថា​ អនុស្សរណៈយោគយល់គ្នាអ៊ីស្លាម៉ាបាដ បានចូលជាធរមាន ដោយ​មាន​ «ប្រសិទ្ធភាពភ្លាមៗ» បន្ទាប់ពីលោក Trump និង​លោក​ Pezeshkian បានចុះហត្ថលេខាតាមប្រព័ន្ធអេឡិចត្រូនិក ក្នុងអំឡុងពេលយប់ថ្ងៃពុធ និងថ្ងៃព្រហស្បតិ៍។

លោក Lin បានបញ្ជាក់​ថា «ប្រទេសចិនស្វាគមន៍ MOU នេះ​» ដោយអំពាវនាវឲ្យ​ភាគីទាំង២ «ប្រកាន់ខ្ជាប់​ស្មារតីនៃកិច្ចសន្យានេះ ហើយ​បំពេញតាម​ការប្តេជ្ញាចិត្តរបស់ពួកគេដោយស្មោះត្រង់​»។ លោក Lin បានសង្កត់​ថា៖ «ការ​ប្រើ​ប្រាស់​កម្លាំងមិនមែនជាដំណោះស្រាយឡើយ​។ ការចរចាដោយស្មើភាពគ្នា គឺជាជម្រើសដ៏​ត្រឹមត្រូវ»។

ហើយ​អ្នកនាំពាក្យក្រសួងការបរទេសចិនរូប​នេះ​បានបន្ថែម​ថា៖ «សង្ឃឹមថា សហរដ្ឋអាមេរិក និងអ៊ីរ៉ង់ នឹងឈានដល់ដំណាក់កាលទី២ នៃការចរចា ដោយមានអាកប្បកិរិយាសមហេតុផល និងជាក់ស្តែង ដោយធ្វើការក្នុងទិសដៅស្រប​គ្នា និងប្រឹង​ប្រែង​ធ្វើ​ការ​យ៉ាង​ខ្លាំង​ក្លា ដើម្បី​សម្រេចបាន​លទ្ធផល»៕