នៅ​ថ្ងៃព្រហស្បតិ៍ (ទី១៨ ខែមិថុនា ឆ្នាំ២០២៦) នេះ ប្រទេសចិនបានរិះគន់កិច្ចប្រឹងប្រែងរបស់ក្រុមប្រទេសធំៗ​ទាំង៧ (G7) ដើម្បីកាត់បន្ថយការពឹងផ្អែកលើរ៉ែសំខាន់ៗរបស់ប្រទេស​ចិន ដោយជំរុញឲ្យ​ប្លុកនេះគោរពច្បាប់ពាណិជ្ជកម្មអន្តរជាតិ និងជៀសវាងនូវ​អ្វីដែលខ្លួនពិពណ៌នាថា ជាការប្រើប្រាស់ «ក្រុម​​តូចៗ» ដើម្បីរំខាន​ដល់​សណ្តាប់ធ្នាប់សេដ្ឋកិច្ចពិភពលោក។

ជា​ការ​ឆ្លើយតបទៅនឹងសេចក្តីថ្លែងការណ៍រួមរបស់ G7 ស្តីពីរ៉ែសំខាន់ៗ អ្នកនាំពាក្យក្រសួងការបរទេសចិន លោក Lin Jian បាននិយាយថា ជំហររបស់ទីក្រុងប៉េកាំង លើការរក្សាស្ថិរភាព និងសន្តិសុខនៃខ្សែច្រវាក់ឧស្សាហកម្ម និងផ្គត់ផ្គង់សកល «នៅតែមិនផ្លាស់ប្តូរ» នោះឡើយ​។

បើយោងតាមការកត់សម្គាល់ដែលបានចែករំលែកដោយសារព័ត៌មាន​ Global Times ដែលមាន​ទំនាក់​ទំនង​ជាមួយរដ្ឋចិន នៅលើបណ្ដាញសង្គម X លោក Lin បានប្រាប់អ្នកសារព័ត៌មានថា «កិច្ចខិតខំប្រឹងប្រែងរបស់ប្រទេសចិនក្នុងការគ្រប់គ្រង និងកែលម្អប្រព័ន្ធគ្រប់គ្រងការនាំចេញរបស់ខ្លួន ស្របតាមការអនុវត្តអន្តរជាតិរួម​ ហើយមានគោលបំណងរក្សាសន្តិភាពពិភពលោក និងស្ថិរភាពក្នុងតំបន់ និងបំពេញតាម​កាតព្វកិច្ចអន្តរជាតិ ដូចជាការមិនរីកសាយភាយអាវុធនុយក្លេអ៊ែរជា​ដើម​» ។

គួរ​បញ្ជាក់ថា បើ​ទោះបីជាសេចក្តីថ្លែងការណ៍របស់ G7 មិនបានលើកឡើងចំៗ អំពីប្រទេសចិនក៏ដោយ ក៏ប្លុក​នេះ​បានសង្កត់ធ្ងន់លើការកាត់បន្ថយការលើ​ពឹងផ្អែកលើអ្នកផ្គត់ផ្គង់តែមួយ ពាក់​ព័ន្ធនឹង​រ៉ែសំខាន់ៗ និងរ៉ែកម្រ ជាវិស័យដែលប្រទេសចិនក្ដោប​ក្ដាប់ធំ​ជាង​គេ​​ជាសកល។

យ៉ាង​ណាក្ដី លោក Lin បានជំរុញឲ្យ​ក្រុមនេះ «គោរពយ៉ាងខ្ជាប់ខ្ជួននូវគោលការណ៍សេដ្ឋកិច្ចទីផ្សារ និងច្បាប់សេដ្ឋកិច្ច និងពាណិជ្ជកម្មអន្តរជាតិ ហើយឈប់ធ្វើឲ្យ​ខូចសណ្តាប់ធ្នាប់សេដ្ឋកិច្ច និងពាណិជ្ជកម្មអន្តរជាតិ ជាមួយនឹងច្បាប់របស់​ «ក្រុម​តូចៗ»៕