នៅថ្ងៃព្រហស្បតិ៍ (ទី១៨ ខែមិថុនា ឆ្នាំ២០២៦) នេះ ប្រធានាធិបតីអ៊ីរ៉ង់ លោក Masoud Pezeshkian បានស្វាគមន៍ ចំពោះអ្វីដែលលោកហៅថា ជាកិច្ចព្រមព្រៀង «ប្រវត្តិសាស្ត្រ» ជាមួយសហរដ្ឋអាមេរិក ដើម្បីបញ្ចប់សង្គ្រាមរបស់ភាគីទាំង​ និងបើកផ្លូវឲ្យមាន​ការចរចាឆ្ពោះទៅរកដំណោះស្រាយចុងក្រោយ។

លោក Pezeshkian បាននិយាយថា៖ «នេះគឺជាឯកសារប្រវត្តិសាស្ត្រ និងជាសារមួយពី​ប្រទេស​អ៊ីរ៉ង់ដ៏មាន​ឥទ្ធិពល​ នោះ​គឺ​ថា​ សន្តិភាពនឹងត្រូវបានសម្រេចនៅក្រោម​ស្រមោលនៃការគោរពគ្នាទៅវិញទៅមក»។ ការ​លើក​ឡើង​របស់លោក​នេះ​ មាន​នៅក្នុង​បង្ហោះលើ​បណ្ដាញ​សង្គម ដោយ​បាន​បង្ហាញរូបភាពនៃឯកសារ ដែលមានហត្ថលេខារបស់លោក ក៏ដូចជាប្រធានាធិបតីអាមេរិក លោក Donald Trump និងអ្នកសម្របសម្រួលរបស់ភាគី​ទាំង​២ គឺនាយករដ្ឋមន្ត្រីប៉ាគីស្ថាន លោក Shehbaz Sharif។

 នៅក្នុងសភាពការណ៍វិវត្តន៍​​ភ្លាមៗ បន្ទាប់ពីមាន​ភាពមិនប្រាកដប្រជា អំពីពេលវេលានៃ​កិច្ចព្រមព្រៀងដែលបានឈាន​ដល់​កាលពីដើមសប្តាហ៍នេះ នឹងត្រូវបានចុះហត្ថលេខាជាផ្លូវការនោះ​ លោក Trump បានដាក់ឈ្មោះរបស់លោកនៅលើឯក​សារ​នោះ​ដោយទឹកខ្មៅដិត​ក្រាស់ អំឡុង​ពិធីជប់លៀងអាហារពេលល្ងាចជាមួយប្រធានាធិបតីបារាំង លោក Emmanuel Macron នៅឯវិមាន Versailles នៅខាងក្រៅទីក្រុងប៉ារីស កាលពីថ្ងៃពុធ។

ការ​ចរចារយៈពេល ២ខែ ឥឡូវនេះ ចាប់ផ្តើមជាមួយនឹងក្រសែភ្នែក​ទាំងអស់សម្លឹង​មើល​ទៅ​ក​ការបើកច្រកសមុទ្រ Hormuz ឡើងវិញ និងថា​ តើ​វឌ្ឍនភាពអាចមាន​ដែរ ឬទេ នៅក្នុងការចរចា ស្ដី​ពី​កម្មវិធីនុយក្លេអ៊ែររបស់អ៊ីរ៉ង់ ដែលទីក្រុងវ៉ាស៊ីនតោនបានសង្ស័យជាយូរមកហើយថា បានលាក់បាំងមហិច្ឆតាផលិតគ្រាប់បែកដោយ​សម្ងាត់​៕