រដ្ឋមន្ត្រីក្រសួងការពារជាតិ លោក Pete Hegseth នៅ​ថ្ងៃព្រហស្បតិ៍ (ទី​១៨ ខែមិថុនា ឆ្នាំ២០២៦) នេះ បានប្រាប់អ្នកសារព័ត៌មានថា សហរដ្ឋអាមេរិកនឹងចាប់ផ្តើមប្រតិបត្តិការ​យោធាឡើងវិញ និងបិទផ្លូវទឹក​ជាថ្មី​ ប្រសិនបើអ៊ីរ៉ង់មិនបំពេញតាមការប្តេជ្ញាចិត្តរបស់ខ្លួន ក្រោមកិច្ចព្រមព្រៀងជាមួយសហរដ្ឋអាមេរិកទេនោះ​។

នៅទីក្រុងប្រ៊ុចសែល​​ ប្រទេសបែលហ្ស៊ិក បន្ទាប់ពីបាន​ជួបជាមួយរដ្ឋមន្ត្រីក្រសួងការពារជាតិរបស់​អង្គការ​ណាតូ (NATO) លោក Hegseth បាននិយាយថា៖ «លោក​ប្រធានាធិបតី បានចង្អុលបង្ហាញថា យើងនឹងត្រៀមខ្លួនរួចរាល់ ដើម្បីចាប់ផ្តើមឡើងវិញ ប្រសិនបើក្រោមពេលវេលាកំណត់នៃកិច្ចពិភាក្សាទាំងនេះ អ៊ីរ៉ង់មិនធ្វើអ្វីដែលខ្លួននិយាយថា ខ្លួននឹងធ្វើនោះ​»។

ប្រមុខ​ក្រសួង​ការពារ​ជាតិរូប​នេះ បាន​សង្កត់​ធ្ងន់​ថា៖ «ប្រសិនបើអ៊ីរ៉ង់មិនគោរពតាមទេនោះ យើងអាចដាក់​ការ​បិទខ្ទប់​ផ្លូវ​ទឹក​យ៉ាងខ្លាំង​ក្លាឡើង​វិញ​»។

បើយោង​តាម​មន្ត្រីជាន់ខ្ពស់មួយរូបរបស់រដ្ឋបាលសហរដ្ឋអាមេរិក បានឲ្យ​ដឹង​ថា ក្នុង​ចំណោម​លក្ខខណ្ឌ​ផ្សេង​ទៀត​ អនុស្សរណៈនៃការយោគយល់គ្នា (MOU) រវាងសហរដ្ឋអាមេរិក និងអ៊ីរ៉ង់ តម្រូវ​ឲ្យ​មាន​ការបើកច្រកសមុទ្រ Hormuz ឡើងវិញ ការ​បន្ធូរបន្ថយការរឹតបន្តឹងហិរញ្ញវត្ថុមួយចំនួនលើអ៊ីរ៉ង់ និងការកំ​ណត់ពីការរំពឹងទុក សម្រាប់ការដោះស្រាយកម្មវិធីនុយក្លេអ៊ែររបស់អ៊ីរ៉ង់ ក្នុងអំឡុងពេលមាន​កិច្ចពិភាក្សាបច្ចេកទេសនាពេលអនាគត៕