សារព័ត៌មាន Wall Street Journal (WSJ) បាន​រាយការណ៍កាល​ពីថ្ងៃ​ព្រហស្បតិ៍ (ទី១៨ ខែមិថុនា ឆ្នាំ២០២៦) ថា អនុរដ្ឋមន្រ្តី​ការពារជាតិអាមេរិក លោក​ Stephen Feinberg បានប្រាប់សមជិក​សភា​តាម​ទូរស័ព្ទនៅសប្តាហ៍នេះថា មន្ទីរបញ្ចកោណ​ត្រូវ​ការ​ថវិកា ៨០ពាន់លាន​ដុល្លារ ដើម្បី​ទូទាត់ការ​ចំណាយ​ ក្នុង​សង្គ្រាម​អ៊ីរ៉ង់ ព្រម​ទាំងការ​ចំណាយ​មិន​ពាក់ព័ន្ធ​សង្គ្រាម​ផ្សេងទៀត​​។

ដោយដកស្រង់សម្តីបុគ្គល​ដែលដឹង​ពីការពិភាក្សា សារព័ត៌មាន​ WSJ បានរាយការណ៍ថា មន្ត្រីក្រសួងការពារជាតិ និយាយថា ទីភ្នាក់ងារ​នានា អាច​នឹង​អស់​ថវិកា សម្រាប់ប្រតិបត្តិការ នា​រដូវក្តៅនេះ ប្រសិន​បើ​សភាមិន​អនុម័តសេចក្តីព្រាងច្បាប់ចំណាយថ្មី ក្នុងសម័យសង្គ្រាមទេនោះ​។

សំណើសុំថវិកាបន្ថែមណាមួយរបស់មន្ទីរបញ្ចកោណ នឹងតម្រូវឲ្យ​មានការយល់ព្រមពីការិយាល័យគ្រប់គ្រង និងថវិការបស់សេតវិមានជាមុនសិន មុនពេលដាក់ជូនសភា។ ថវិការបស់ក្រសួងការពារជាតិសម្រាប់ឆ្នាំសារពើពន្ធ ២០២៦ មានចំនួនប្រហែល ១សែន​កោដិ​ដុល្លារ។

យោងតាមរបាយការណ៍នេះ បាន​ឲ្យ​ដឹង​ទៀត​ថា អ្នកដែលដឹងពីការពិភាក្សា បានបញ្ជាក់​ថា មន្ទីរបញ្ចកោណ មានទំនុកចិត្តគ្រប់គ្រាន់ ជុំវិញ​ផែនការដែលលោក​ Feinberg បានជម្រាបជូនសមាជិក​សភា ក្នុងរយៈពេលប៉ុន្មានថ្ងៃថ្មីៗនេះ។ បើយោងតាមប្រភពមួយ ក្នុង​ចំណោម​នោះ​ បាន​ប្រាប់ថា មួយចំនួននៃ​ថវិកានោះ នឹងត្រូវប្រើប្រាស់ សម្រាប់ប្រតិបត្តិការដឹកជញ្ជូន ប្រាក់បៀវត្សរ៍បុគ្គលិក និងគ្រាប់រំសេវ ក្នុងចំណោមការ​ចំណាយ​ផ្សេងទៀត។

ការទាក់ទង​របស់លោក Feinberg ទៅកាន់​សមាជិក​សភានេះ​ កើត​ឡើង​ស្របពេលមាន​កិច្ចប្រជុំ រវាងរដ្ឋមន្ត្រីក្រសួងការពារជាតិ លោក Pete Hegseth និងសមាជិកព្រឹទ្ធសភាជាន់ខ្ពស់មកពីគណបក្សសាធារណរដ្ឋនៅវិមាន​ Capitol Hill ក្នុងសប្តាហ៍នេះ ដែល​លទ្ធភាពនៃសំណើសុំថវិកាការពារជាតិបន្ថែមត្រូវបានលើក​យក​មក​ពិភាក្សា។ នេះបើយោងតាមការ​ឲ្យ​ដឹង​ពី​សមាជិក​សភា​៕