មេដឹកនាំសហភាពអឺរ៉ុប (EU) នឹងជជែក​តវ៉ា​គ្នា ជុំវិញ​ថវិការបស់ប្លុក នៅថ្ងៃសុក្រ (ទី១៩ ខែមិថុនា ឆ្នាំ២០២៦) នេះ ខណៈ​សំណើដំបូង ស្តីពីអ្វីដែល EU គួរចំណាយក្នុងឆ្នាំ២០២៨-២០៣៤ និងទីកន្លែង​ណា​ដែលប្លុក​នេះ​គួរទទួលបានថវិកាពី​ បានទាក់ទាញការរិះគន់យ៉ាងខ្លាំង ទាំង​ពីអ្នករួមចំណែកថវិកាសុទ្ធ​ និងអ្នកទទួលផល។

ថវិកា EU បគឺជារបៀបដែល EU ផ្តល់ហិរញ្ញប្បទានដល់គោលនយោបាយទាំងអស់របស់ខ្លួន រាប់​ចាប់ពីការគាំទ្រដល់កសិករ ដល់ការធ្វើឲ្យ​ស្តង់ដារនៃការរស់នៅស្មើគ្នា នៅទូទាំងប្លុក ២៧ប្រទេស រហូតដល់ការអភិវឌ្ឍបច្ចេកវិទ្យាថ្មី និងកម្មវិធីផ្លាស់ប្តូរនិស្សិត។ យោងតាមសំណើរបស់គណៈកម្មការអឺរ៉ុប បាន​ឲ្យ​ដឹង​ថា ថវិកាឆ្នាំ២០២៨-២០៣៤ គួរតែមានចំនួន ២សែនកោដិ​អឺរ៉ូ (២,៣សែនកោដិ​ដុល្លារ)។

ប្រទេសអ្នកមាន​ជាង​គេ​របស់​ EU ចំណាយច្រើនចូលទៅក្នុងកញ្ចប់​ថវិកានេះ​ ជាង​ពួកគេទទួលបាន ខណៈដែលប្រទេសក្រីក្រទទួលបានច្រើនជាងអ្វីដែលពួកគេចំណាយ។ រៀងរាល់ ៧ឆ្នាំម្តង ក្រុមទាំង២ ជជែក​តវ៉ាគ្នាយ៉ាងស្វិតស្វាញ ដើម្បីឈានដល់កិច្ចព្រមព្រៀងជាឯកច្ឆន្ទដែលត្រូវការ ដើម្បី​ឲ្យ​កញ្ចប់​ថវិកាទទួល​បាន​ការ​អនុម័ត។

តាមច្បាប់ រដ្ឋាភិបាល EU ត្រូវឯកភាព ស្ដីពី​ថវិកាឆ្នាំ២០២៨-២០៣៤ នៅចុងឆ្នាំ២០២៧។ ប៉ុន្តែដោយសារមាន​ការបោះឆ្នោតនៅប្រទេសបារាំង អ៊ីតាលី ប៉ូឡូញ អេស្ប៉ាញ ក្រិក អេស្តូនី ហ្វាំងឡង់ និងស្លូវ៉ាគី នៅឆ្នាំក្រោយ កិច្ចព្រមព្រៀងមួយគួរតែត្រូវបានសម្រេចនៅចុងឆ្នាំ២០២៦ ដើម្បីកុំឲ្យ​ក្លាយជាចំណាប់ខ្មាំងនៃការ​ធ្វើ​យុទ្ធនាការបោះឆ្នោតទាំងអស់៕