នាវាដឹកប្រេងបានធ្វើដំណើរឆ្លងកាត់ច្រកសមុទ្រ Hormuz ហើយសហរដ្ឋអាមេរិកបានបញ្ជាក់​ថា ខ្លួនបានដកការបិទខ្ទប់​ផ្លូវទឹក​របស់ខ្លួន លើអ៊ីរ៉ង់ កាល​ពី​ថ្ងៃព្រហស្បតិ៍ (ទី១៨ ខែមិថុនា ឆ្នាំ​២០២៦) ខណៈដែលកិច្ចព្រមព្រៀងបណ្តោះអាសន្ន ដើម្បីបញ្ចប់សង្គ្រាម ចូលជាធរមាន តែ​បញ្ហាសំខាន់ៗ នៅតែមិនទាន់ដោះស្រាយនៅឡើយ​ទេ រវាងប្រទេសទាំង២។

តម្លៃប្រេងបានធ្លាក់ចុះដល់កម្រិតទាបបំផុតជាលើក​ដំបូង ចាប់តាំងពីថ្ងៃទី២ ខែមីនា ខណៈដែលអ្នកវិភាគបានលើក​ឡើង​ថា ការនាំចេញឆ្លងកាត់ច្រកសមុទ្រនេះ ដែលគ្រប់គ្រងការផ្គត់ផ្គង់ប្រេងប្រហែល ១ភាគ៥ របស់​សកលលោក អាចវិលត្រឡប់មករកភាពធម្មតាវិញហើយ នៅក្នុងប៉ុន្មាន​ខែខាងមុខ។ ប៉ុន្តែការ​បន្ត​សង្គ្រាម​របស់​អ៊ីស្រាអែល ប្រឆាំងនឹងក្រុមហេសបូឡា នៅប្រទេស​លីបង់ ធ្វើ​ឲ្យមាន​មន្ទិល​សង្ស័យ​អំពីថា តើកិច្ចព្រមព្រៀងនេះ នឹងមានប្រសិទ្ធភាពដែរ ឬយ៉ាង​ណា​។

នៅទីក្រុងវ៉ាស៊ីនតោន សម្ព័ន្ធមិត្តក្នុង​គណបក្ស​សាធារណរដ្ឋមួយចំនួនរបស់លោក​ប្រធានាធិបតី Donald Trump នៅក្នុងសភា បានចោទ​សួរថា តើលោក​បានធ្វើ​សម្បទាន​ច្រើនពេកដែរ ឬទេ​ ដើម្បីបញ្ចប់ជម្លោះ​នេះ​។ ចំណែក​មេដឹកនាំកំពូលរបស់អ៊ីរ៉ង់ លោក​ Ayatollah Mojtaba Khamenei បាននិយាយថា លោក Trump បានចុះហត្ថលេខាលើកិច្ចព្រមព្រៀងនេះ «ដោយសារអស់ជម្រើស​» ហើយបានបង្ហាញសញ្ញាថា ការចរចានាពេលខាងមុខ ស្ដីពី​កម្មវិធីនុយក្លេអ៊ែររបស់អ៊ីរ៉ង់ ជា​ហេតុផលដែលលោក Trump បានបញ្ជាក់ ដើម្បី​ចាប់ផ្តើមសង្គ្រាម នឹងមិនងាយស្រួលនោះទេ។

គួរបញ្ជាក់ថា កិច្ចព្រមព្រៀង​នេះ​ផ្តល់​ពេល​ឲ្យ​ក្រុម​អ្នកចរចានូវ​រយៈពេល​ ៦០​ថ្ងៃ ​ដើម្បី​ឈានដល់​កិច្ចព្រមព្រៀង​ ជុំវិញ​​ស្ថានភាព​នៃ​កម្មវិធី​នុយក្លេអ៊ែរ​របស់​អ៊ីរ៉ង់ និង​បង្កើត​មូលនិធិ​កសាង​ឡើងវិញ​ចំនួន ៣០០ពាន់​លាន​ដុល្លារសម្រាប់​អ៊ីរ៉ង់ និង​ការជំរុញ​​ផ្នែក​ហិរញ្ញវត្ថុ​ផ្សេងទៀត៕