យោងតាមសារព័ត៌មាន Japan Today បាន​ឲ្យ​ដឹង​ថា រដ្ឋមន្ត្រីការពារជាតិជប៉ុន លោក Shinjiro Koizumi មានគម្រោងទៅទស្សនកិច្ចនៅ​ប្រទេសទួរគី នា​ដើមខែកក្កដានេះ​ ដើម្បីចូលរួមព្រឹត្តិការណ៍ទាក់ទងនឹងកិច្ចប្រជុំកំពូលរបស់​អង្គការ​ណាតូ (NATO) និងធ្វើកិច្ចប្រជុំជាមួយសមភាគីការពារជាតិ។

ការ​ធ្វើ​ដំណើរនេះ ដែលត្រូវបានគេរំពឹងថា នឹងធ្វើឡើងស្របពេលជាមួយនឹងកិច្ចប្រជុំកំពូលរបស់​អង្គការ​ណាតូ នៅទីក្រុង Ankara នៅថ្ងៃទី ៧-៨ ខែកក្កដា នឹងគូសបញ្ជាក់ពីការចូលរួមផ្នែកសន្តិសុខកាន់តែខ្លាំងឡើងរបស់ជប៉ុនជាមួយសម្ព័ន្ធមិត្តឆ្លងមហាសមុទ្រ​អាត្លង់ទិក និងដៃគូរបស់ខ្លួន ទោះបីជាប្រទេសនេះមិនមែនជាសមាជិកអង្គការ​ណាតូក៏ដោយ។

ជាមួយ​គ្នានេះ យោងតាមសារព័ត៌មាន ​​Mainichi Media បាន​ឲ្យដឹង​ លោក Koizumi ត្រូវបានគេរំពឹងថានឹងចូលរួមក្នុងការជួបជុំ ទាក់ទងនឹងអង្គការ​ណាតូ និងធ្វើការចរចាទ្វេភាគីជាមួយរដ្ឋមន្ត្រីការពារជាតិមកពីរដ្ឋជាសមាជិកនៃ​សម្ព័ន្ធភាព​នេះ​ នៅក្រៅកិច្ចប្រជុំកំពូល។

របាយការណ៍នេះ បានឲ្យ​ដឹង​ថា ការពិភាក្សាទំនងជាផ្តោតលើបញ្ហាប្រឈមសន្តិសុខ ក្នុងតំបន់ និងកិច្ចសហប្រតិបត្តិការការពារជាតិ។ ប្រទេសជប៉ុនបានពង្រីកកិច្ចសហប្រតិបត្តិការជាមួយអង្គការណាតូជាបន្តបន្ទាប់ ក្នុងប៉ុន្មានឆ្នាំថ្មីៗនេះ ជាពិសេសនៅក្នុងវិស័យនានា ដូចជាការការពារតាមប្រព័ន្ធ​អ៊ីនធឺណិត សន្តិសុខដែនសមុទ្រ បច្ចេកវិទ្យាថ្មីៗ និងការគាំទ្រដល់អ៊ុយក្រែន៕