ប្រធានាធិបតីបារាំង លោក Emmanuel Macron កាលពីថ្ងៃព្រហស្បតិ៍ (ទី១៨ ខែមិថុនា ឆ្នាំ២០២៦) បាន​ឲ្យដឹង​ថា យុទ្ធសាស្ត្រយោធារបស់អ៊ីស្រាអែល នៅប្រទេស​លីបង់ តំបន់ហ្កាហ្សា និងតំបន់ West Bank គឺដើរ​បញ្ច្រាសផលប្រយោជន៍ផ្ទាល់ខ្លួន ព្រោះវាបង្ក​ឲ្យ​មានការមិន​ពេញ​ចិត្ត និងអំពើហិង្សា។

លោក Macron បានប្រាប់ប្រព័ន្ធ​ផ្សព្វផ្សាយ​ France 2 ថា ប្រធានាធិបតីអាមេរិក លោក Donald Trump គឺត្រឹម​ត្រូវ ដែល​អំពាវនាវឲ្យ​នាយករដ្ឋមន្ត្រីអ៊ីស្រាអែល លោក Benjamin Netanyahu «បង្ហាញស្មារតីទទួលខុសត្រូវ»។ លោកបានសង្កត់ធ្ងន់ថា សន្តិសុខរបស់អ៊ីស្រាអែល «មិនអាចធានាបានដោយការដណ្ដើម​កាន់​កាប់​ដែន​ដីអ្នក​ជិតខាងនោះទេ»។

លោកបានបន្ត​ថា៖ «យុទ្ធសាស្ត្រដែល (លោក Netanyahu) បន្តអនុវត្ត នៅតំបន់​ហ្កាហ្សា តំបន់ West Bank និងនៅភាគខាងត្បូងនៃ​ប្រទេសលីបង់ គឺផ្ទុយពីផលប្រយោជន៍របស់អ៊ីស្រាអែលរយៈពេលវែង ពីព្រោះវាបង្ក​ឲ្យមានការមិន​ពេញ​ចិត្ត និងអំពើហិង្សាក្នុងចំណោមប្រជាជនទាំងអស់នៅក្នុងតំបន់»។

ជាមួយ​គ្នា​នេះ លោក Macron បានបញ្ជាក់ជាថ្មីម្តងទៀត អំពីសារៈសំខាន់នៃកិច្ចព្រមព្រៀងសន្តិភាពអ៊ីរ៉ង់ដែលទើបចុះហត្ថលេខាថ្មីៗ សម្រាប់ប្រទេសលីបង់។ ហើយ​លោកបានកត់សម្គាល់ថា៖ «យើងនឹងប្រមូលផ្តុំសហគមន៍អន្តរជាតិយ៉ាងឆាប់រហ័ស ដើម្បីជួយកងទ័ពលីបង់ឲ្យ​ទទួលបានការគ្រប់គ្រងដែន​ដីរបស់ខ្លួនឡើងវិញ»។

លើសពី​នេះ​ទៀត លោក Macron បានគូសបញ្ជាក់បន្ថែមទៀតថា សង្គ្រាមអ៊ីរ៉ង់មិនទាន់ចប់ទាំងស្រុងនៅឡើយទេ ទោះបីជាមានកិច្ចព្រមព្រៀងក៏ដោយ ខណៈពេលដែលបានបញ្ជាក់ជាថ្មីថា បានចូលដល់ដំណាក់កាលថ្មីនៃកិច្ចសហប្រតិបត្តិការ និងការសន្ទនា៕