អ្នកជំនាញរញ្ជួយដីរដ្ឋ នៅថ្ងៃសុក្រ (ទី១៩ ខែមិថុនា ឆ្នាំ២០២៦) បាន​ឲ្យ​ដឹង​ថា រលក​រញ្ជួយ ឬរញ្ជួយ​ដី​តូច​ៗ​បន្ថែមសរុបចំនួន ៨.៣៨១ដង​ ត្រូវបានកត់ត្រា ចាប់តាំងពីមាន​រញ្ជួយដីកម្រិត ៧,៨រ៉ិចទ័រ នៅឆ្នេរសមុទ្រទីក្រុង​​ Maasim របស់​ខេត្ត​ Sarangani នៅកោះ Mindanao កាលពីថ្ងៃទី៨ ខែមិថុនា។

នៅក្នុងការ​ធ្វើ​បច្ចុប្បន្នភាព​ថ្មីដែលចេញផ្សាយនៅម៉ោង ៥ព្រឹកម៉ោង (ម៉ោង​ក្នុងស្រុក) នា​ថ្ងៃទី១៩ ខែមិថុនានេះ​ វិទ្យាស្ថានភ្នំភ្លើង និងរញ្ជួយដីហ្វីលីពីន (Phivolcs) បានឲ្យ​ដឹង​ថា រលក​រញ្ជួយបន្ថែមចំនួន ២.០៤០ដង​ ត្រូវបានកត់ត្រា ខណៈដែល ៩០ដង​ផ្សេង​ទៀត​ ត្រូវបានរាយការណ៍តាម​រយៈ​ការ​មាន​អារម្មណ៍ដឹង​ពី​អ្នក​ស្រុក​។

Phivolcs បានឲ្យ​ដឹង​ទៀត​ថា រលក​រញ្ជួយ មានកម្រិត​ចាប់ពី ១,២ ដល់ ៦,៤រ៉ិច​ទ័រ​។ ទិន្នន័យរបស់ Phivolcs បានបង្ហាញថា សកម្មភាពរញ្ជួយដីតូចៗ​ជាបន្តបន្ទាប់ ជាទូទៅបានធ្លាក់ចុះចាប់តាំងពីមាន​រញ្ជួយដីធំ​ ដោយព្រឹត្តិការណ៍ដែលបានកត់ត្រាប្រចាំថ្ងៃ បានធ្លាក់ចុះពី ១.០៨៣ដង​ ក្នុងអំឡុងតាម​ដាន​លើកដំបូង ចន្លោះ​ថ្ងៃទី៨​ និងទី​៩​ ខែមិថុនា មកត្រឹម ៥១៦​ដង​ ចន្លោះ​ថ្ងៃទី១៨​ និងទី១៩​ ខែមិថុនា។

Phivolcs មុននេះបានបញ្ជាក់​ថា រលក​រញ្ជួយជាបន្តបន្ទាប់ដែលកើត​ឡើងដោយសារការរញ្ជួយដ៏ខ្លាំងក្លានេះ អាចបន្តរយៈពេលជាច្រើនសប្តាហ៍ ឬរហូតដល់មួយខែ។

គួរបញ្ជាក់​ថា របាយការណ៍ពី​ក្រុមប្រឹក្សាជាតិកាត់បន្ថយ និងគ្រប់គ្រងហានិភ័យគ្រោះមហន្តរាយ (NDRRMC) របស់ប្រទេសហ្វីលីពីន កាល​ពី​ថ្ងៃទី១៨ ខែមិថុនា បាន​ឲ្យដឹង​ថា មនុស្សយ៉ាងហោចណាស់ ៧៨នាក់ បានបាត់បង់ជីវិត​ ហើយ​ ៣០នាក់ទៀតកំពុងបាត់ខ្លួន ខណៈ​ប្រមាណ​ជា​​ ១,៥លាន​នាក់​ រង​ប៉ះពាល់​ បន្ទាប់ពីមាន​គ្រោះរញ្ជួយដីកម្រិត ៧,៨រ៉ិចទ័រ នៅ​ភាគខាងត្បូងហ្វីលីពីន កាលពីថ្ងៃទី៨ ខែមិថុនា៕