សារព័ត៌មានជប៉ុនរាយការណ៍ថា សាលាបឋមសិក្សាមួយកន្លែងស្ថិតក្នុងតំបន់ភាគខាងជើងទីក្រុងតូក្យូ ប្រទេសជប៉ុន ត្រូវបានជម្លៀសមនុស្សចេញនៅថ្ងៃសុក្រនេះ ក្រោយអគ្គិភ័យឆាបឆេះបន្ទប់តូរ្យតន្រ្តីនៅជាន់ទី ៤ ។

រូបភាពវីដេអូឃ្លីបសាក្សី ឃើញក្មេងៗជាច្រើននាក់ កំពុងរង់ចាំការសង្រ្គោះនៅក្រៅបន្ទប់ ខណៈផ្សែងខ្មៅហុយនៅពីក្រោយពួកគេ ។

ទូរទស្សន៍រដ្ឋជប៉ុន NHK រាយការណ៍ថា សិស្សជាច្រើននាក់រងរបួស ដោយសារស្រូបផ្សែង ។ ពេលដែលអគ្គិភ័យចាប់ផ្តើមមានសិស្ស និងបុគ្គលិកប្រហែល ៣០០នាក់ នៅក្នុងសាលាបឋមសិក្សា Takinogawa Daisan ។

ទោះបីជាយ៉ាងណាក៏ដោយ សិស្សសាលា និងបុគ្គលិកទាំងអស់ ត្រូវបានជម្លៀសចេញដោយសុវត្ថិភាព ហើយអគ្គិភ័យត្រូវបានពន្លត់ជាស្ថាពរ ក្រោយរយៈពេលប្រហែល ៣ម៉ោង ក្នុងនោះ រថយន្តពន្លត់អគ្គិភ័យ ៧៥គ្រឿង និងក្រុមភ្នាក់ងារពន្លត់អគ្គិភ័យរាប់សិបនាក់ នៅកន្លែងកើតហេតុ ។

កាសែត Kyodo News រាយការណ៍ថា ភាគច្រើននៃសិស្ស ១០នាក់ ដែលរងរបួស បានស្រូបផ្សែង ហើយមនុស្ស ៤នាក់ ត្រូវបានសង្រ្គោះនៅក្នុងអគារសាលារៀន ។

ដោយឡែក មូលហេតុនៃបណ្តាលឲ្យអគ្គិភ័យនេះកើតឡើង ពុំត្រូវបានបានគេដឹងច្បាស់ភ្លាមៗនោះទេ ខណៈការស៊ើបអង្កេតកំពុងធ្វើឡើង ៕