កាលពីថ្ងៃព្រហស្បតិ៍ (ទី១៨ ខែមិថុនា ឆ្នាំ២០២៦) ប្រធានផ្នែកជំនួយមនុស្សធម៌របស់អង្គការសហប្រជាជាតិ (UN) បាននិយាយថា ប្រជាជនដែលរស់នៅក្នុងតំបន់ហ្កាហ្សា សមនឹងទទួលបាន «សេចក្តីថ្លៃថ្នូរ» របស់ពួកគេឡើងវិញ ជាជាងគ្រាន់តែជាការរស់រានមានជីវិតពីមួយថ្ងៃទៅមួយថ្ងៃ ខណៈលោកបានរិះគន់ការរារាំងរបស់អ៊ីស្រាអែលដល់ការចែកចាយជំនួយមនុស្សធម៌។
លោក Tom Fletcher ដែលបានថ្លែងទៅកាន់ក្រុមប្រឹក្សាសន្តិសុខអង្គការសហប្រជាជាតិ (UNSC) បានទទួលស្គាល់ថា លំហូរជំនួយបានប្រសើរឡើង ចាប់តាំងពីបទឈប់បាញ់រវាងអ៊ីស្រាអែល និងហាម៉ាស បានចូលជាធរមានកាលពីថ្ងៃទី១០ ខែតុលាឆ្នាំមុន ដោយមានរថយន្តដឹកជញ្ជូនជាមធ្យម ១០០គ្រឿង ចូលទៅក្នុងដែនដីប៉ាឡេស្ទីនជារៀងរាល់ថ្ងៃ។
ប៉ុន្តែលោក Fletcher បានបញ្ជាក់ថា៖ «ការទទួលបានមិនមាំទាំទាំងនេះ គឺពិតណាស់ជាកម្រិតដ៏តិចតួចបំផុតនៃអ្វីដែលប្រជាជនប៉ាឡេស្ទីនត្រូវការ និងអ្វីដែលយើងអាចផ្តល់ឲ្យ ហើយនិងអ្វីដែលច្បាប់អន្តរជាតិទាមទារ»។
លោកបានបន្ថែមថា៖ «យើងមិនអាចបណ្ដោយឲ្យគោលបំណង និងឆន្ទៈដ៏ធំបំផុតរបស់យើងក្លាយជាពិភពលោកមួយដែលកុមារត្រឹមតែមានកាឡូរីគ្រប់គ្រាន់ ដើម្បីរស់រានមានជីវិត និងគេចផុតពីការទម្លាក់គ្រាប់បែកឥតឈប់ឈរ ប៉ុន្តែនៅតែស្រេកឃ្លាន ត្រូវសត្វកណ្តុរខាំ គ្មានផ្ទះសម្បែងជ្រកកោន និងអត់បានចូលពីសាលារៀននោះទេ។ ការបញ្ឈប់ការប្រយុទ្ធមិនគ្រប់គ្រាន់នោះទេ ពោលគឺយើងត្រូវតែស្តារភាពថ្លៃថ្នូរឡើងវិញ»។
ជាមួយគ្នានេះ លោក Fletcher បានអំពាវនាវជាពិសេសឲ្យបើកចំណុចឆ្លងកាត់ទាំងអស់ចូលទៅក្នុងតំបន់ហ្កាហ្សា និងការលុបចោលជាបន្ទាន់នូវការរឹតបន្តឹងរបស់អ៊ីស្រាអែល លើលំហូរនៃទំនិញនានា ដូចជាឧបករណ៍វេជ្ជសាស្ត្រ និងប្រេងឥន្ធនៈជាដើម៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
