រដ្ឋមន្ត្រីសន្តិសុខជាតិស្តាំនិយមជ្រុល​របស់អ៊ីស្រាអែល លោក Itamar Ben-Gvir នៅថ្ងៃសុក្រ (ទី១៩ ខែមិថុនា ឆ្នាំ២០២៦) នេះ បានអំពាវនាវឲ្យ​មានការវាយប្រហារកាន់តែខ្លាំង នៅក្នុងប្រទេសលីបង់ បន្ទាប់ពីកងទ័ពអ៊ីស្រាអែល បានឲ្យ​ដឹង​ថា ទាហាន ៤រូប ត្រូវបានសម្លាប់ អំឡុង​ការប្រយុទ្ធគ្នានៅភាគខាងត្បូង។

តាម​រយៈ​ការបង្ហោះមួយនៅលើបណ្ដាញ​សង្គម X លោក Ben-Gvir បានលើក​ឡើង​ថា អ៊ីស្រាអែលគួរតែឆ្លើយតបយ៉ាងខ្លាំងក្លា ទោះបីជាមានសម្ពាធអន្តរជាតិក៏ដោយ។ លោកបានសរសេរថា៖ «ដោយការគោរពយ៉ាងខ្ពង់ខ្ពស់ ចំពោះជនជាតិអាមេរិក អ៊ីស្រាអែលត្រូវតែបញ្ជាក់ឲ្យ​ច្បាស់ដល់ពិភពលោកទាំងមូលថា ឈាមរបស់កូនប្រុស (ទាហាន​) របស់យើង និងសន្តិសុខរបស់ប្រជាពលរដ្ឋរបស់យើង មិនត្រូវបានបាត់បង់ឡើយ។ ប្រទេសលីបង់ទាំងមូលត្រូវតែឆេះ​សន្ធោសន្ធៅ​»។

លោកបានបន្ថែមថា «កាតព្វកិច្ចដ៏ខ្ពង់ខ្ពស់របស់យើង គឺការពារប្រជាពលរដ្ឋអ៊ីស្រាអែល និងទាហាននៃកងទ័ព IDF (កងកម្លាំង​ការពារជាតិអ៊ីស្រាអែល) ហើយការប្តេជ្ញាចិត្តនេះមានសារៈសំខាន់​ លើការពិចារណាផ្សេងទៀតទាំងអស់»។ លោក Ben-Gvir បានកត់សម្គាល់ថា លោកបានបង្ហាញពីជំហររបស់លោកដោយផ្ទាល់ទៅកាន់នាយករដ្ឋមន្ត្រី លោក​ Benjamin Netanyahu។ លោក​បាន​ប្រាប់ថា៖ «ខ្ញុំបានប្រាប់នាយករដ្ឋមន្ត្រី សូម្បីតែនៅក្នុងកិច្ចប្រជុំឯកជនរបស់យើងក៏ដោយ ដែល​នោះ​គឺ​ថា សម្រាប់ទឹកភ្នែកមួយ​តំណក់ៗរបស់អ្នក​ម្តាយអ៊ីស្រាអែល អ្នក​ម្តាយលីបង់មួយពាន់នាក់ត្រូវតែយំយែក​ខ្លាំង​ជាង​នេះ»។

ការកត់សម្គាល់នេះបានកើតឡើងបន្ទាប់ពីយោធាអ៊ីស្រាអែលបានប្រកាសថា ទាហាន ៤រូប ត្រូវបានសម្លាប់ ក្នុងអំឡុងពេលប៉ះទង្គិចគ្នានៅភាគខាងត្បូងនៃ​ប្រទេសលីបង់ ស្រប​ពេលមានភាពតានតឹងជាបន្តបន្ទាប់តាមបណ្តោយព្រំដែនអ៊ីស្រាអែល-លីបង់៕