អង្គការឧតុនិយមពិភពលោក(WMO)និយាយថា អាកាសធាតុអាក្រក់ និងហេតុការណ៍ពាក់ព័ន្ធនឹងអាកាសធាតុ បានសម្លាប់មនុស្សជាង ៣ពាន់នាក់ និងមនុស្សយ៉ាងហោច ១៣លាននាក់ បានរងផលប៉ះពាល់នៅទូទាំងទ្វីបអាហ្រ្វិក អំឡុងឆ្នាំ ២០២៥ ក្នុងនោះគ្រោះទឹកជំនន់ស្មើនឹងជាងពាក់កណ្តាលនៃគ្រោះមហន្តរាយ ។

យោងតាមរបាយការណ៍របស់ទីភ្នាក់ងារអាកាសធាតុអង្គការសហប្រជាជាតិមួយនេះ បានឲ្យដឹងថា ទ្វីបអាហ្វ្រិកឡើងកម្តៅផែនដីលឿនជាងកម្រិតមធ្យមសកល ក្នុងនោះអាហ្វ្រិកខាងជើងរកឃើញអត្រាឡើងកម្តៅផែនដីប្រហែល ០,៤អង្សាសេ អំឡុងទសវត្សរ៍ ចន្លោះឆ្នាំ ១៩៩១ និងឆ្នាំ ២០២៥ ។

របាយការណ៍នេះ សរសេរថា ទឹកជំនន់ធ្ងន់ធ្ងរនៅប្រទេសនីហ្សេរីយ៉ា កាលពីខែឧសភា នាំឲ្យមនុស្ស ២០០នាក់ស្លាប់ ហើយទឹកជំនន់នៅសាធារណរដ្ឋប្រជាធិបតេយ្យកុងហ្គោកាលពីខែមេសា បណ្តាលឲ្យមនុស្ស ១៦០នាក់ស្លាប់ ក្នុងនោះគ្រោះរាំងស្ងួតបង្កផលប៉ះពាល់ដល់មនុស្សជាង ៨,៥លាននាក់នៅអាហ្វ្រិកខាងកើត ។

លោក Harsen Nyambe គឺជាប្រធានផ្នែកសេដ្ឋកិច្ចប្រកបដោយចីរភាពនៅគណៈកម្មការសហភាពអាហ្វ្រិកនិយាយអំឡុងពេលបញ្ចេញរបាយការណ៍នេះនៅទីក្រុង Lusaka ប្រទេសសំប៊ីថា បម្រែបម្រួលអាកាសធាតុ លែងជាការគំរាមកំហែងពីចម្ងាយទៀតហើយ ។ វាគឺជាវិបត្តិបច្ចុប្បន្នដែលធ្វើឲ្យផ្លាស់ប្តូរសេដ្ឋកិច្ចរបស់ពួកយើង សង្គមរបស់ពួកយើង ក៏ដូចជាប្រព័ន្ធអេកូឡូស៊ី ។

ខណៈពេលនោះដែរ ផ្ទាំងទឹកកករបស់អាហ្វ្រិកបានបាត់បង់ទំហំជាង ៩០ភាគរយ ចាប់តាំងពីចុងសតវត្សរ៍ទី ១៩ ក្នុងនោះផ្ទាំងទឹកកនៅភ្នំ Mt. Kilimanjaroបានធ្លាក់ចុះពីទំហំ ១១,៤ គមក្រឡា កាលពីឆ្នាំ ១៩៩០ មកនៅតិចជាង ១គ.មក្រឡា ក្នុងរយៈពេលប៉ុនា្មនឆ្នាំកន្លងមកនេះ ៕