ទីភ្នាក់​ងារ​តាមដានផ្លូវ​សមុទ្រ នៅ​ថ្ងៃសុក្រ (ទី​១៩ ខែមិថុនា ឆ្នាំ២០២៦)​ នេះ បាន​ឲ្យ​ដឹង​ថា ចរាចរណ៍ដឹកជញ្ជូនឆ្លង​កាត់ច្រកសមុទ្រ Hormuz បានកើនឡើងដល់អត្រាខ្ពស់បំផុត ក្នុងរយៈពេល ២ខែបន្ទាប់ពីមាន​កិច្ចព្រមព្រៀង ដើម្បីបញ្ឈប់សង្គ្រាមអាមេរិក-អ៊ីរ៉ង់។

នាវាពាណិជ្ជកម្មសរុបចំនួន ២៥គ្រឿង បានឆ្លងកាត់ច្រកសមុទ្រដែលទើបបើកឡើងវិញ កាល​ពី​ថ្ងៃព្រហស្បតិ៍ ជាចំនួនខ្ពស់បំផុតចាប់តាំងពីពាក់កណ្តាលខែមេសា។​ នេះបើយោងតាមទិន្នន័យពីក្រុមហ៊ុនតាមដាន AXSMarine។

កំណើន​នេះបានកើតឡើង បន្ទាប់ពីអ៊ីរ៉ង់ និងសហរដ្ឋអាមេរិកបានយល់ព្រមនៅសប្តាហ៍នេះ ដើម្បីបើកផ្លូវដ៏សំខាន់នេះ​ឡើងវិញ ក្រោមកិច្ចព្រមព្រៀង ដើម្បីបញ្ចប់សង្គ្រាម ប៉ុន្តែមុនពេលមាន​ការពន្យារពេលនៃការចរចា រវាងភាគីទាំង២ នៅប្រទេសស្វីសដែលត្រូវបានគ្រោងទុក សម្រាប់ថ្ងៃសុក្រ ក្រោមកិច្ចព្រមព្រៀងនោះ។

 AXSMarine បានឲ្យ​ដឹង​នៅក្នុងសេចក្តីប្រកាសព័ត៌មានមួយថា៖ «កាល​ពី​ថ្ងៃទី១៨ ខែមិថុនា យើងបានសង្កេតឃើញនាវាពាណិជ្ជកម្មចំនួន ២៥គ្រឿងដែលត្រូវបានផ្ទៀងផ្ទាត់ ឆ្លងកាត់ច្រកសមុទ្រ Hormuz ដែលជាចំនួនខ្ពស់បំផុតក្នុងមួយថ្ងៃ គិត​ចាប់តាំងពីថ្ងៃទី១៨ ខែមេសា និងច្រើនជាង ៥ដងនៃកម្រិតជាមធ្យមប្រចាំថ្ងៃដែលបានកត់ត្រាក្នុងអំឡុងពេលដប់ថ្ងៃដំបូងនៃខែមិថុនា»។

គួរបញ្ជាក់​ថា បើយោងតាមទិនានុប្បវត្តិដឹកជញ្ជូន Lloyd's List បាន​បង្ហាញថា មុនសង្គ្រាម នាវាប្រហែល ១២០គ្រឿងក្នុងមួយថ្ងៃ បានឆ្លងកាត់ច្រកសមុទ្រនេះ។ បើយោងតាមអ្នកសេដ្ឋកិច្ច បាន​ឲ្យ​ដឹង​ថា ១ភាគ៥នៃការនាំចេញប្រេង និងឧស្ម័នធម្មជាតិរាវរបស់ពិភពលោក បានឆ្លងកាត់ច្រកសមុទ្រនេះ ក្នុងពេលសន្តិភាព​៕