ហេតុការណ៍ហិង្សាចំនួន ២ បានកើតឡើងនៅភាគខាងត្បូងនៃ​ប្រទេសថៃ នា​ថ្ងៃសុក្រ (ទី១៩ ខែមិថុនា ឆ្នាំ២០២៦) នេះ។ គេហទំព័រវិទ្យុ Radio Thailand Yala របស់នាយកដ្ឋានទំនាក់ទំនងសាធារណៈ បានរាយការណ៍ថា ក្រុមអ្នកវាយប្រហារមួយក្រុម បានធ្វើការវាយប្រហារដោយគ្រាប់បែកនៅម៉ោង ៨:១០ព្រឹក (ម៉ោង​ក្នុង​ស្រុក) នៅ​ថ្ងៃទី១៩ ខែមិថុនា ឆ្នាំ២០២៦ ដោយកំណត់គោលដៅលើមន្ត្រីនគរបាលល្បាតព្រំដែនមកពីអង្គភាពការពារគ្រូបង្រៀន។

ហេតុការណ៍នេះបានកើតឡើងនៅលើផ្លូវ Ban Pulo Saniyae–Ban Sakai ក្នុងតំបន់​ Moo 4 នៃអនុតំបន់ Ban Rae ក្នុង​ស្រុក Thanto របស់​ខេត្ត Yala ។ ការផ្ទុះនេះបានបណ្ដាល​ឲ្យ​មន្ត្រី ៦នាក់រងរបួស ដែលក្នុងនោះ២នាក់ធ្ងន់ធ្ងរ។

មន្ត្រីរងរបួសទាំងអស់ត្រូវបានបញ្ជូនជាដំបូងទៅ​មន្ទីរ​ពេទ្យ​តំបន់​ Thanto Hospital មុនពេលមន្ត្រីរងរបួសធ្ងន់ធ្ងរទាំង ២នាក់ ត្រូវបានដឹកតាមឧទ្ធម្ភាគចក្រទៅកាន់មន្ទីរពេទ្យខេត្ត Yala Hospital។

ចំណែក​ការវាយប្រហារ​ដោយ​គ្រាប់បែក​មួយ​ទៀត ​បាន​កើតឡើង​នៅ​​ថ្ងៃ​ដដែលនេះ​ ​នៅ​ម៉ោង ១១:៣០នាទីព្រឹក ម៉ោងក្នុង​ស្រុក ដោយ​កំណត់​គោលដៅ​ទៅលើ​អង្គភាព​ប្រតិបត្តិការ​ពិសេស​របស់នគរបាល​​ Pattani ​នៅភូមិ Ban Khuan Yi ក្នុង​តំបន់ Moo 3 នៃ​អនុតំបន់​ Pado ស្រុក Mayo ខេត្ត Pattសani។

ការវាយប្រហារ​នេះ​បាន​កើតឡើង​នៅពេល​ដែល​មន្ត្រី​កំពុង​ត្រឡប់​មកពី​បង្កើត​ចំណុចត្រួតពិនិត្យ​សន្តិសុខ ​នៅក្នុង​តំបន់​នោះ។ ហេតុការណ៍​នេះ​បាន​បណ្តាល​ឲ្យ​មន្ត្រី​ ៥នាក់​បន្ថែម​​ទៀត​រងរបួស​៕