ប្រធានាធិបតីលីបង់ លោក Joseph Aoun នៅ​ថ្ងៃសុក្រ (ទី១៩ ខែមិថុនា ឆ្នាំ២០២៦) នេះ​ បានថ្កោលទោសការវាយប្រហារថ្មីៗរបស់អ៊ីស្រាអែល នៅភាគខាងត្បូង និងភាគខាងកើតនៃ​ប្រទេសលីបង់ ដែលបានពង្រីកកាន់តែ​ធំ​ បណ្តាលឲ្យ​មានការសម្លាប់ និងការបំផ្លិចបំផ្លាញកាន់តែច្រើន ហើយបានអំពាវនាវឲ្យ​មាន «បទឈប់បាញ់គ្រប់ជ្រុង​ជ្រោយ​ឲ្យ​បានលឿនតាមដែលអាចធ្វើទៅបាន»។

តាមរយៈ​សេចក្តីថ្លែងការណ៍ពីការិយាល័យរបស់លោកនៅលើវេទិកាបណ្ដាញ​សង្គម X លោក Aoun បានលើកឡើង​ថា៖ «អ្វីដែលយើងកំពុងឃើញនៅថ្ងៃនេះ នៅភាគខាងត្បូង និងតំបន់ Bekaa ការពង្រីកការវាយប្រហាររបស់អ៊ីស្រាអែល និងការសម្លាប់ និងការបំផ្លិចបំផ្លាញកាន់តែច្រើន បង្កើតបានជាការកើនឡើងនូវ​ភាព​តាន​តឹង​ដ៏គ្រោះថ្នាក់ និងត្រូវបានថ្កោលទោស»។

លោក Aoun បានបន្ថែម​ថា៖ «ការវាយប្រហារទាំង​នេះ​បានប៉ះពាល់ដល់មនុស្សស្លូតត្រង់រាប់សិបនាក់ រួមទាំងស្ត្រី និងកុមារផង​ដែរ​ ហើយកំពុងធ្វើ​ឲ្យ​ខូចដល់កិច្ចខិតខំប្រឹងប្រែង ដើម្បីពង្រឹងបទឈប់បាញ់ និងបញ្ចប់សង្គ្រាម ជាពិសេសបន្ទាប់ពីមាន​ការវិវត្ត​ថ្មីៗ រវាងសហរដ្ឋអាមេរិក និងអ៊ីរ៉ង់។ តែ​ការវាយប្រហារថ្មីៗទាំង​​នោះ នឹងមិនរារាំងយើងមិន​ឲ្យ​ធ្វើការ ដើម្បីសម្រេចបាននូវ​បទឈប់បាញ់គ្រប់ជ្រុង​ជ្រោយឲ្យ​បានឆាប់តាមដែលអាចធ្វើទៅបាននោះទេ»។

គួរបញ្ជាក់ថា សេចក្តីថ្លែងការណ៍នេះកើតមាន​បន្ទាប់ពីជនជាតិលីបង់យ៉ាងហោចណាស់ ៣១នាក់ត្រូវបានសម្លាប់នៅភាគខាងត្បូង និងភាគខាងកើតនសប្រទេសលីបង់ ចាប់តាំងពីព្រឹកថ្ងៃសុក្រ ខណៈដែលអ៊ីស្រាអែលបន្តវាយប្រហារប្រទេសនេះ ទោះបីជាកិច្ចព្រមព្រៀង រវាងសហរដ្ឋអាមេរិក និងអ៊ីរ៉ង់ចូលជាធរមានក៏ដោយ​៕