ទីភ្នាក់ងារទេសចរណ៍ចិនជាច្រើន បានចាប់​ផ្ដើម​ទទួលយកការកក់ឡើង​វិញ​ សម្រាប់ដំណើរកម្សាន្តជាក្រុមទៅកាន់ប្រទេសជប៉ុន ប៉ុន្តែក្រោយមកក្រុម​ហ៊ុន​ខ្លះបានបញ្ឈប់ការលក់ បន្ទាប់ពីរបាយការណ៍ពី​ប្រព័ន្ធផ្សព្វផ្សាយ អំពីការវិវត្តនេះ បានទាក់ទាញការចាប់អារម្មណ៍នៅក្នុងប្រទេសចិន។​ នេះបើយោងតាមប្រភពមួយដែលស្និទ្ធនឹងបញ្ហានេះ។

ក្រុមហ៊ុនទេសចរណ៍កំពុងរៀបចំផែនការ និងលក់ដំណើរកម្សាន្តជាក្រុម សម្រាប់រដូវវិស្សមកាលរដូវក្តៅខែកក្កដា-សីហា ខណៈដែលជប៉ុននៅតែជាគោលដៅដ៏ពេញនិយម ក្នុងចំណោមភ្ញៀវទេសចរចិន។ នេះបើយោងតាមប្រភពឧស្សាហកម្មមួយ។

ប្រភពនេះបាននិយាយថា៖ «ទីភ្នាក់ងារទេសចរណ៍មិនអាចបន្ត​ដំណើរការ​បានទេ (ក្នុងនាមជាអាជីវកម្ម) ប្រសិនបើពួកគេមិនផ្តល់ជូន (ដំណើរកម្សាន្តទៅ​ជប៉ុន)»។

គួរបញ្ជាក់​ថា រដ្ឋាភិបាលចិនបានជំរុញឲ្យ​ពលរដ្ឋចៀសវាងការធ្វើដំណើរទៅកាន់ប្រទេសជប៉ុន បន្ទាប់ពីការកត់សម្គាល់ កាលពីខែវិច្ឆិកាឆ្នាំ​មុន ដោយនាយករដ្ឋមន្ត្រីជប៉ុន លោកស្រី Sanae Takaichi ពាក់ព័ន្ធ​នឹង​ការចូលរួមដែលអាចកើតមានរបស់ជប៉ុន ប្រសិន​បើ​កោះ​តៃវ៉ាន់កើតមាន​ហេតុការណ៍ផ្ទុះសង្គ្រាម​​។

រដ្ឋាភិបាលចិន​ក៏បានណែនាំដល់ទីភ្នាក់ងារទេសចរណ៍ធំៗក្នុងស្រុក ឲ្យ​កាត់បន្ថយការដាក់ពាក្យសុំទិដ្ឋាការទៅកាន់ជប៉ុន និងកាត់បន្ថយ​អ្នក​ទៅ​លេង​កម្សាន្ត​មកត្រឹម ៦០ភាគរយនៃកម្រិតធម្មតា ដែលជំរុញឲ្យ​មានការលុបចោល និងផ្អាកដំណើរកម្សាន្តជាក្រុម៕