ប្រធានាធិបតីអាមេរិក លោក Donald Trump នៅ​ថ្ងៃសុក្រ (ទី​១៩ ខែមិថុនា ឆ្នាំ២០២៦) នេះ បានអះអាងថា សមត្ថភាពយោធារបស់អ៊ីរ៉ង់ត្រូវបានធ្វើ​ឲ្យ​ចុះខ្សោយយ៉ាងខ្លាំង ដោយបដិសេធការរិះគន់ពីក្រុម​ប្រជាធិបតេយ្យ​ ជុំវិញ​ការដោះស្រាយជម្លោះរបស់រដ្ឋបាលលោក។

លោក Trump បានលើក​ឡើង​នៅលើវេទិកាបណ្ដាញសង្គម Truth Social របស់លោកថា៖ «សង្គ្រាមបានធ្វើឲ្យ​អ៊ីរ៉ង់ចុះខ្សោយ!។ លែងមានកងទ័ពអាកាស កងទ័ពជើងទឹក ឧបករណ៍ប្រឆាំងយន្តហោះ រ៉ាដា ឬអ្វីផ្សេងទៀតទៀតហើយ»។ លោកបានសរសេរទៀត​ថា៖ «យើងមិនបានឈាន​ដល់​កិច្ច​ព្រម​ព្រៀង ដោយសារអស់ជម្រើសទេ តែ​អ៊ីរ៉ង់វិញ​ទេដែល​គ្មាន​ជម្រើស។ ពួកគេបានបញ្ចប់ហើយ! យើងនឹងបន្ត​រយៈពេល ៦០​ថ្ងៃទៀត​។ ពួកគេមិនទទួលបានប្រាក់ឡើយ​ សូម្បី ១សេន!»។

ជាមួយ​គ្នានេះ លោក Trump ក៏បានរិះគន់ផង​ដែរ ចំពោះ​ក្រុមខាង​គណបក្ស​ប្រជាធិបតេយ្យ​ ដែល​បានលើកឡើង​ថា អ៊ីរ៉ង់ស្ថិតក្នុងស្ថានភាពរឹងមាំជាងកាលពីប៉ុន្មានខែមុននេះ​។

គួរបញ្ជាក់​ថា កាល​ពី​ល្ងាចថ្ងៃពុធ លោក Trump និងប្រធានាធិបតីអ៊ីរ៉ង់ លោក Masoud Pezeshkian បានចុះហត្ថលេខាតាមប្រព័ន្ធអេឡិចត្រូនិកលើអនុស្សរណៈយោគយល់គ្នាចំនួន ១៤ចំណុច ដោយមាន​គោលបំណងបញ្ចប់ជម្លោះដែលបានចាប់ផ្តើមកាល​ពី​ថ្ងៃទី២៨ ខែកុម្ភៈ រវាងសហរដ្ឋអាមេរិក អ៊ីស្រាអែល និងអ៊ីរ៉ង់៕