ក្រុមហ៊ួទីនៅប្រទេសយេម៉ែនកាលពីថ្ងៃសុក្របានព្រមានអ៊ីស្រាអែលប្រឆាំងនឹងការពង្រីកប្រតិបត្តិការយោធារបស់ខ្លួន នៅក្នុងប្រទេសលីបង់ ដោយនិយាយថា ខ្លួនបានត្រៀមខ្លួនរួចជាស្រេចដើម្បីឆ្លើយតបទៅនឹង«ការកើនឡើងភាពតានតឹងបន្ថែមទៀតនៅក្នុងតំបន់នេះ»។

នៅក្នុងសេចក្តីថ្លែងការណ៍មួយដែលចាក់ផ្សាយដោយទូរទស្សន៍ Al-Masirah របស់ក្រុមនេះ ក្រុមហ៊ួទីបានចោទប្រកាន់អ៊ីស្រាអែលថា បានរំលោភលើអនុស្សរណៈនៃការយោគយល់ស្តីពីបទឈប់បាញ់រវាងអ៊ីរ៉ង់ និងសហរដ្ឋអាមេរិក ដែលគ្របដណ្តប់លើរណសិរ្សជាច្រើន រួមទាំងប្រទេសលីបង់ផងដែរ ដោយនិយាយថា សកម្មភាពយោធារបស់អ៊ីស្រាអែលបន្តប្រឈមនឹងហានិភ័យនៃការបំផ្លាញកិច្ចខិតខំប្រឹងប្រែងកាត់បន្ថយការកើនឡើងភាពតានតឹងក្នុងតំបន់។

ក្រុមនេះបានព្រមានថា អ័ក្សតស៊ូ នឹងមិននៅស្ងៀមចំពោះមុខអ្វីដែលខ្លួនពិពណ៌នាថា ជាការឈ្លានពានរបស់អ៊ីស្រាអែលដែលកំពុងបន្ត ហើយបានបញ្ជាក់ជាថ្មីនូវការត្រៀមខ្លួនរបស់ខ្លួន ក្នុងការប្រឈមនឹងការ វិវត្តណាមួយដែលពាក់ព័ន្ធនឹងសហរដ្ឋអាមេរិក និងអ៊ីស្រាអែល។

ការព្រមាននេះ បានកើតឡើង នៅពេលដែលអ៊ីស្រាអែលបានបើកការវាយប្រហារយ៉ាងខ្លាំងទៅលើភាគខាងត្បូង និងខាងកើតប្រទេសលីបង់ ដោយកំណត់គោលដៅទៅលើក្រុមហេសបូឡា ដែលជាសមាជិកសំខាន់មួយរបស់អ័ក្សតស៊ូដែលគាំទ្រដោយអ៊ីរ៉ង់៕