ប្រធានាធិបតីអាមេរិកលោក Donald Trump បានថ្លឹងថ្លែងអំពីអនាគតរបស់នាយករដ្ឋមន្ត្រីអង់គ្លេសលោក Keir Starmer កាលពីថ្ងៃអាទិត្យ ដោយអះអាងថាលោកនឹងលាលែងពីតំណែង ស្របពេលមានការសង្ស័យយ៉ាងទូលំទូលាយថាមេដឹកនាំចក្រភពអង់គ្លេសរូបនេះ អាចកំណត់ពេលវេលាសម្រាប់ការចាកចេញរបស់លោកនៅថ្ងៃចន្ទ ២២មិថុនានេះ ។

លោក Trump បាននិយាយក្នុងការបង្ហោះមួយលើបណ្ដាញសង្គមTruth Social ថា លោក Keir Starmer នឹងលាលែងពីតំណែងជានាយករដ្ឋមន្ត្រីនៃចក្រភពអង់គ្លេស ទោះបីជានៅតែមិនច្បាស់ថាតើប្រធានាធិបតីអាមេរិករូបនេះដឹងរឿងច្បាស់លាស់ ឬក៏លោកគ្រាន់តែនិយាយទេ ។

ប្រព័ន្ធផ្សព្វផ្សាយ PA របស់ចក្រភពអង់គ្លេសបានរាយការណ៍ថាលោក Trump មិនបាននិយាយជាមួយលោក Starmer ទេចាប់តាំងពីមេដឹកនាំទាំងពីរបានជួបគ្នានៅឯកិច្ចប្រជុំកំពូល G7 នៅប្រទេសបារាំងកាលពីដើមសប្តាហ៍មុន។

នៅក្នុងការបង្ហោះនៅលើប្រព័ន្ធផ្សព្វផ្សាយសង្គមរបស់លោក លោកTrump បានរិះគន់លោក Starmer ដែលជាមេដឹកនាំគណបក្សពលករឆ្វេងនិយមកណ្ដាលរបស់ចក្រភពអង់គ្លេស ដោយនិយាយថាការធ្វើគោលនយោបាយដែលគ្មានប្រសិទ្ធភាពនឹងនៅពីក្រោយការបរាជ័យខាងនយោបាយរបស់លោក។

លោក Trump បានសរសេរថា លោក Starmer បានបរាជ័យយ៉ាងធ្ងន់ធ្ងរលើប្រធានបទសំខាន់ពីរគឺ អន្តោប្រវេសន៍ និងថាមពល ខណៈលោកជូនពរលោក Starmer ។

លោក Trump ក៏បានរិះគន់លោក Starmer ផងដែរចំពោះការមិនគាំទ្រអាមេរិកក្នុងសង្គ្រាមអាមេរិក-អ៊ីស្រាអែលជាមួយអ៊ីរ៉ង់៕