តម្លៃប្រេងបានកើនឡើងនៅថ្ងៃចន្ទនេះ បន្ទាប់ពីការដឹកជញ្ជូនឆ្លងកាត់ច្រកសមុទ្រ Hormuz ត្រូវបានកាត់បន្ថយ ខណៈការចរចារវាងមន្ត្រីសហរដ្ឋអាមេរិក និងអ៊ីរ៉ង់ នៅក្នុងកិច្ចប្រជុំលើកដំបូងក្រោមកិច្ចព្រមព្រៀងសន្តិភាពបណ្តោះអាសន្ន បានចាប់ផ្តើមដោយពុំមានភាពរលូន។

តម្លៃប្រេងឆៅ Brent បានកើនឡើង៥៤សេន ឬ ០,៦៧% ឡើងដល់៨១,១១ដុល្លារក្នុងមួយបារ៉ែល។ តម្លៃប្រេងឆៅរបស់សហរដ្ឋអាមេរិក West Texas Intermediate មានតម្លៃ៧៨,៦២ដុល្លារក្នុងមួយបារ៉ែល កើនឡើង២,០២ដុល្លារ ឬ២,៦៤% មុនពេលផុតកំណត់កិច្ចសន្យានៅថ្ងៃចន្ទនេះ។

យោងតាមទិន្នន័យដឹកជញ្ជូនបានឲ្យដឹងថា ចំនួននាវាដែលបានឆ្លងកាត់ច្រកសមុទ្រ Hormuz បានថយចុះយ៉ាងខ្លាំងកាលពីថ្ងៃអាទិត្យ បន្ទាប់ពីអ៊ីរ៉ង់ បានប្រកាសថាខ្លួនបានបិទផ្លូវទឹកនេះជាថ្មីម្តងទៀត ដោយលើកឡើងពីការរំលោភលើកិច្ចព្រមព្រៀងសន្តិភាពបណ្តោះអាសន្នរបស់អ៊ីស្រាអែល និងសហរដ្ឋអាមេរិក។

ប្រធានាធិបតីសហរដ្ឋអាមេរិក លោក Donald Trump បានគំរាមថានឹងបន្តការវាយប្រហារលើអ៊ីរ៉ង់ ទោះបីជាអនុប្រធានាធិបតីអាមេរិក លោក JD Vance បានជួបជាមួយមន្ត្រីអ៊ីរ៉ង់កាលពីថ្ងៃអាទិត្យសម្រាប់ការចរចាលើកដំបូងក្រោមកិច្ចព្រមព្រៀងសន្តិភាពបណ្តោះអាសន្នក៏ដោយ ខណៈទីក្រុងតេអេរ៉ង់បាននិយាយថា សហរដ្ឋអាមេរិក មិនបានបំពេញតាមការប្តេជ្ញាចិត្តរបស់ខ្លួនក្នុងការបញ្ឈប់ការប្រយុទ្ធនៅក្នុងប្រទេសលីបង់។