អាជ្ញាធរការពារជាតិកោះតៃវ៉ាន់បាននិយាយថា តៃវ៉ាន់ បានចាប់ផ្តើមសមយុទ្ធត្រៀមប្រយុទ្ធរយៈពេល ៥ ថ្ងៃនៅថ្ងៃចន្ទ ២២ មិថុនាសប្ដាហ៍នេះ ក្នុងគោលបំណងពន្លឿនការដាក់ពង្រាយយោធាក្នុងករណីមានការវាយប្រហារពីចិន។

អាជ្ញាធរការពារជាតិ (MND) បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា “សមយុទ្ធត្រៀមប្រយុទ្ធភ្លាមៗ” ដែលកំពុងដំណើរការរហូតដល់ថ្ងៃសុក្រ គឺជាផ្នែកមួយនៃការហ្វឹកហ្វឺនប្រតិបត្តិការរួមគ្នាប្រចាំឆ្នាំដែលបានគ្រោងទុក។

យោធាតំបន់តៃវ៉ាន់តែងតែធ្វើសមយុទ្ធដើម្បីត្រៀមខ្លួនសម្រាប់ការវាយប្រហារដែលអាចកើតមានពីប្រទេសចិន ដែលអះអាងថាកោះតៃវ៉ាន់ជាផ្នែកមួយនៃទឹកដីរបស់ខ្លួន ហើយបានគំរាមប្រើកម្លាំងដើម្បីក្រសោបយកកោះនេះ មកដាក់នៅក្រោមការគ្រប់គ្រងរបស់ខ្លួន។

អាជ្ញាធរការពារជាតិកោះនេះបាននិយាយថា សមយុទ្ធនេះមានគោលបំណង “បណ្តុះបណ្តាលអង្គភាពគ្រប់កម្រិតទាំងអស់ក្នុងអំឡុងពេលដំណាក់កាលដាក់ពង្រាយត្រៀមប្រយុទ្ធ ដោយធ្វើឱ្យពួកគេស្គាល់ការអនុវត្តប្រយុទ្ធ និងបរិយាកាសសមរភូមិ និងពង្រឹងសមត្ថភាពរបស់ពួកគេក្នុងការផ្លាស់ប្តូរយ៉ាងឆាប់រហ័សរវាងប្រតិបត្តិការក្នុងសម័យសន្តិភាព និងសម័យសង្គ្រាម។

កោះតៃវ៉ាន់បានចំណាយប្រាក់រាប់ពាន់លានដុល្លារដើម្បីធ្វើឱ្យប្រសើរឡើងនូវយោធារបស់ខ្លួនក្នុងរយៈពេលមួយទសវត្សរ៍កន្លងមកនេះ ប៉ុន្តែស្ថិតនៅក្រោមសម្ពាធយ៉ាងខ្លាំងរបស់សហរដ្ឋអាមេរិកឱ្យធ្វើបន្ថែមទៀតដើម្បីការពារខ្លួនពីការគំរាមកំហែងកាន់តែខ្លាំងពីប្រទេសចិន៕