ការផ្ទុះដ៏ខ្លាំងមួយ បានបណ្តាលឲ្យឆាបឆេះនៅស្ថានីយនាំចេញឧស្ម័នធម្មជាតិដ៏សំខាន់របស់ប្រទេសកាតា កាលពីយប់ថ្ងៃអាទិត្យ ទី ២១ ខែមិថុនា ខណៈបុគ្គលិកបានព្យាយាមបន្តប្រតិបត្តិការនៅទីនោះ បន្ទាប់ពីអ៊ីរ៉ង់ បានទម្លាក់គ្រាប់បែកក្នុងអំឡុងសង្គ្រាម បង្កឱ្យមានអគ្គិភ័យ និងបណ្ដាលឲ្យមនុស្សយ៉ាងហោចណាស់ ៥៤ នាក់រងរបួស និងមនុស្ស ១៨ នាក់ផ្សេងទៀតនៅបាត់ខ្លួន។

ការផ្ទុះនៅតំបន់ឧស្សាហកម្ម Ras Laffan អាចបង្កភាពវឹកវរបន្ថែមទៀតនៅក្នុងទីផ្សារថាមពលសកល ជាពិសេសខណៈប្រទេសកាតានៅតែជាប្រទេសផលិតឧស្ម័នធម្មជាតិកំពូលមួយរបស់ពិភពលោក។ ប្រទេសកាតា បានបិទផលិតកម្មរបស់ខ្លួន បន្ទាប់ពីវិធានការទប់ទល់របស់អ៊ីរ៉ង់នៅច្រកសមុទ្រ Hormuz ដែលមានន័យថាប្រទេសកាតាមិនអាចដឹកជញ្ជូនទំនិញទៅឲ្យអតិថិជនរបស់ខ្លួនបានឡើយ។

ដោយអ៊ីរ៉ង់ បន្ធូរបន្ថយការគ្រប់គ្រងរបស់ខ្លួននៅច្រកសមុទ្រ ខណៈការចរចានៅតែបន្តលើការបញ្ចប់សង្គ្រាមជាអចិន្ត្រៃយ៍ ប្រទេសកាតា បានចាប់ផ្តើមការងារដើម្បីព្យាយាមចាប់ផ្ដើមស្ថានីយនាំចេញរបស់ខ្លួនឡើងវិញ។ កាលពីយប់ថ្ងៃអាទិត្យ ការងារនោះបានបង្កឱ្យមានការផ្ទុះ និងមានអគ្គិភ័យនៅរោងចក្រផ្គត់ផ្គង់ឧស្ម័ន Barzan នេះបើយោងតាមក្រុមហ៊ុន QatarEnergy គ្រប់គ្រងដោយរដ្ឋ។