លោក Mohammad Bagher Ghalibaf ប្រធានអ្នកចរចារបស់ទីក្រុងតេអេរ៉ង់ កាលពីថ្ងៃអាទិត្យ (ទី២១ ខែមិថុនា ឆ្នាំ២០២៦) បានព្រមានសហរដ្ឋអាមេរិកកុំ​ឲ្យ​គំរាមកំហែងអ៊ីរ៉ង់ ដោយប្រកាស​ក្ដែង​ៗ​ថា កងកម្លាំងប្រដាប់អាវុធរបស់ប្រទេស​លោក​ត្រៀមខ្លួនរួចជាស្រេច ដើម្បីឆ្លើយតប។

បន្ទាប់ពីប្រធានាធិបតីអាមេរិក លោក Donald Trump បានគំរាមវាយប្រហារអ៊ីរ៉ង់ ដោយសារតែការគាំទ្ររបស់ខ្លួន ចំពោះក្រុមហេសបូឡា លោក Ghalibaf បាននិយាយថា៖ «តើពួកគេមិនគិតទេ​ថា ប្រសិនបើការគំរាមកំហែងរបស់ពួកគេ មានប្រសិទ្ធភាពមែននោះ​ ពួកគេនឹងមិនបានឈានដល់ស្ថានភាពគ្មាន​ជម្រើស​ដូចពេល​នេះទេ? យើងមិនចាប់​អារម្មណ៍​ពី​ការគំរាមកំហែងរបស់អាមេរិកឡើយ​»។

លោក Ghalibaf បាន​សង្កត់ធ្ងន់​ថា៖ «ពួកគេគួរ​តែ​មាន​ការប្រុងប្រយ័ត្នជាមួយនឹងសេចក្តីថ្លែងការណ៍របស់ពួកគេបន្តិច​។ កងកម្លាំងប្រដាប់អាវុធរបស់យើងត្រៀមខ្លួនរួចជាស្រេច ដើម្បីឆ្លើយតបទៅនឹង​ការ​គំរាម​កំហែង​តាមរបៀបផ្សេងៗ។ មិនថា ពួកគេនិយាយអ្វីក៏ដោយ យើងគឺជាអ្នក​ធ្វើសកម្មភាព»។

កាល​ពី​ព្រឹក​ថ្ងៃអាទិត្យ លោក Trump បានបង្ហោះសារនៅលើវេទិកា Truth Social របស់លោក​ថា «អ៊ីរ៉ង់ត្រូវតែបញ្ឈប់ក្រុម​ធ្វើ​សង្គ្រាម​តំណាង​របស់ពួកគេនៅក្នុងប្រទេសលីបង់កុំ​ឲ្យ​បង្កបញ្ហា​ភ្លាម​ៗ»។ លោកបានបន្ថែមថា៖ «ប្រសិនបើពួកគេមិនធ្វើដូច្នោះ​ទេ យើងនឹងវាយប្រហារអ៊ីរ៉ង់យ៉ាងខ្លាំងម្តងទៀត ដូចដែលយើងបានធ្វើកាលពីសប្តាហ៍មុន គ្រាន់តែខ្លាំង​ជាងមុន​ទៀត!!!»។

គួរបញ្ជាក់​ថា ការប្រយុទ្ធគ្នា រវាងអ៊ីស្រាអែល និងក្រុម​ហេសបូឡា ដែល​កើត​ឡើងដោយសារតែ​ក្រុមសកម្មប្រយុទ្ធគាំទ្រដោយទីក្រុងតេអេរ៉ង់ បាន​វាយប្រហារអ៊ីស្រាអែល ដើម្បីគាំទ្រអ៊ីរ៉ង់ នៅក្នុងសង្គ្រាមដ៏ទូលំទូលាយ បានគំរាមកំហែងម្តងហើយម្តងទៀតធ្វើឲ្យ​ខូចដល់កិច្ចប្រឹងប្រែងសន្តិភាព៕