អាជ្ញាធរសុខាភិបាលបានឲ្យដឹង​ថា ការ​ឆ្លងវីរុស Ebola សរុប ដែលត្រូវ​បានបញ្ជាក់នៅក្នុងសាធារណរដ្ឋប្រជាធិបតេយ្យកុងហ្គោ បានកើនឡើងលើសពី ១.០០០ករណី កាល​ពី​ថ្ងៃអាទិត្យ (ទី២២ ខែមិថុនា ឆ្នាំ២០២៦) ខណៈមានការឆ្លងថ្មីត្រូវបានកត់ត្រា។

ការធ្វើ​បច្ចុប្បន្ន​របស់ក្រសួងសុខាភិបាល បានបង្ហាញថា ករណីដែលបានបញ្ជាក់នៃជំងឺនេះ បានកើនឡើងដល់ ១.០០៣ករណី ក្នុង​នោះ​រួមមាន​ការស្លាប់ចំនួន ២៥៤នាក់ ចាប់តាំងពីការផ្ទុះឡើងនូវ​ជំងឺនេះត្រូវបានប្រកាសកាល​ពី​ថ្ងៃទី១៥​ ខែឧសភា ដោយមានអត្រាមរណភាព ២៥,៣ភាគរយ។

រដ្ឋមន្ត្រីក្រសួងសុខាភិបាល លោក Roger Kamba បាននិយាយថា កិច្ចប្រឹងប្រែងឆ្លើយតបទៅនឹងវីរុសនេះ នៅតែបន្តមាន​នៅក្នុងខេត្ត Ituri, North Kivu និង South Kivu ដោយ​មាន​ភាពល្អ​ប្រសើរឡើង សម្រាប់​ចំនួនអ្នកជាសះស្បើយ ប៉ុន្តែអត្រាតាមដានទំនាក់ទំនងថយចុះ។ លោកបាន​បន្ថែម​ថា យ៉ាងហោចណាស់មានអ្នក​ជាសះស្បើយ ១០០នាក់ត្រូវបានកត់ត្រា ខណៈពេលដែលអ្នកជំងឺ ៣៦៥នាក់ នៅតែស្ថិតក្នុង​វិធានការដាក់ឲ្យ​នៅដាច់ដោយឡែកពីគេ​ ឬសម្រាកព្យាបាលនៅមន្ទីរពេទ្យ។

គួរបញ្ជាក់​ថា កាលពីសប្តាហ៍មុន មជ្ឈមណ្ឌលគ្រប់គ្រង និងបង្ការជំងឺអាហ្វ្រិក (Africa CDC) បានព្រមានថា ការផ្ទុះឡើងនូវជំងឺនេះ នាពេលបច្ចុប្បន្ន អាចកាន់តែអាក្រក់ជាងអ្វីដែលបានឃើញ ក្នុង​អំឡុងពេល​មាន​​ការរាតត្បាតនៃជំងឺនេះ នៅអាហ្វ្រិកខាងលិច ឆ្នាំ២០១៤-២០១៦ ដែលបានសម្លាប់មនុស្សជាង ១១.០០០នាក់ នៅក្នុងប្រទេសហ្គីណេ លីបេរីយ៉ា និងសៀរ៉ាឡេអូន ប្រសិនបើការចម្លងមិនត្រូវបានគ្រប់គ្រងយ៉ាង​ឆាប់រហ័ស​ទេ​នោះ​៕