រយៈពេលជិត ២ឆ្នាំ ក្រោយដឹកនាំគណបក្សការងារឆ្ពោះទៅរកជ័យជំនះភ្លូកទឹកភ្លូកដីនៅការបោះឆ្នោតសកល លោក Keir Starmer បានប្រកាសការលាលែងពីតំណែងរបស់លោក ស្របពេលការបះបោរកើនឡើងក្នុងគណបក្ស ហើយនិងការចាប់ផ្តើមការប្រកួតប្រជែងសម្រាប់នាយករដ្ឋមន្រ្តីទី ៧ របស់ចក្រភពអង់គ្លេស ក្នុងរយៈពេល ១០ឆ្នាំ ។

នៅក្នុងសុន្ទរកថាដ៏រំជួលចិត្តមួយនាថ្ងៃចន្ទនេះ លោក Starmerនិយាយថា លោកនឹងបន្តកាន់តំណែងរហូតដល់មេដឹកនាំគណបក្សការងារថ្មីត្រូវបានរកឃើញ ហើយនិងរហូតដល់នាយករដ្ឋមន្រ្តីថ្មីត្រូវបានជ្រើសតាំង ។

ការប្រកួតប្រជែងដណ្តើមតំណែងថ្នាក់ដឹកនាំនឹងចាប់ផ្តើមនៅថ្ងៃទី ៩ ខែកក្កដាខាងមុខ ហើយនិងបញ្ចប់នៅពេលសម្រាកនារដូវក្តៅរបស់សភាអង់គ្លេស ។

ជោគវាសនានយោបាយរបស់លោក Starmer បានរងផលប៉ះពាល់ដោយសាររឿងអាស្រូវដ៏ធ្ងន់ធ្ងរជាបន្តបន្ទាប់ ខណៈដែលសមាជិកសភាជាច្រើនរបស់លោក បានស្តីបន្ទោសលោកថា មាននូវកំហុសឆ្គងគោលនយោបាយ ដែលបានបង្ហាញថា មិនទទួលបានការគាំទ្រយ៉ាងខ្លាំងពីសាធារណជន ។

ការអំពាវនាវឲ្យលោក Starmer លាលែងពីតំណែង បានមានកាន់តែខ្លាំងឡើងៗ ចាប់តាំងពីខែឧសភារហូតមក ។

លោក Starmer វ័យ ៦៣ឆ្នាំ បានប្ដេជ្ញាថា នឹងតទល់ជាមួយការប្រឆាំងណាមួយ ប៉ុន្តែនៅពេលដែលការរំពឹងទុកកើនឡើងនៅចុងសប្តាហ៍នេះ សូម្បីប្រធានាធិបតីអាមេរិក លោក Donald Trump ក៏បានចូលរួមការបញ្ចេញមតិយោបល់ផងដែរ ។

លោក Trump បានសរសេរនៅលើបណ្ដាញសង្គម Truth Social ថា លោកនាយករដ្ឋមន្ត្រីរូបនេះ បានបរាជ័យយ៉ាងធ្ងន់ធ្ងរ ជុំវិញប្រធានបទសំខាន់២ គឺអន្តោប្រវេសន៍ និងថាមពល ។

សូមបញ្ជាក់ថា ចាប់តាំងពីឆ្នាំ ២០១៦រហូតមក ចក្រភពអង់គ្លេស មាននាយករដ្ឋមន្រ្តី ៦នាក់ ពោលគឺមាននាយករដ្ឋមន្រ្តីម្នាក់ រាល់រយៈពេល ១ឆ្នាំកន្លះម្តង បើធៀបនឹងលោកស្រី Margaret Thatcher និងលោក Tony Blair វិញ ពួកគេម្នាក់ៗ បានដឹកនាំប្រទេសមួយនេះ អស់រយៈពេលជាង ១ទសវត្សរ៍ ៕