ក្រសួងការបរទេសអ៊ីរ៉ង់ បានឲ្យដឹងនៅ​ថ្ងៃចន្ទ (ទី​២២ ខែមិថុនា ឆ្នាំ២០២៦) នេះថា ខ្លួនបានធ្វើ «កិច្ចពិភាក្សាខ្លីៗ» ជាមួយសហរដ្ឋអាមេរិក ជុំវិញបញ្ហានុយក្លេអ៊ែរ ក្នុងអំឡុងពេលមាន​កិច្ចពិភាក្សាកម្រិតខ្ពស់នៅប្រទេសស្វីស ដោយពណ៌នាអំពីការផ្លាស់ប្តូរនេះថា «គ្រាន់តែជាការបង្ហាញជំហរ» ខណៈពេលដែលគណៈប្រតិភូរបស់ខ្លួន កំពុងធ្វើដំណើរត្រឡប់ទៅប្រទេស​វិញ។

អ្នកនាំពាក្យក្រសួងការបរទេស លោក Esmail Baghaei បានប្រាប់ទីភ្នាក់ងារសារព័ត៌មាន IRNA ដែលគ្រប់គ្រងដោយរដ្ឋថា៖ «គណៈប្រតិភូអាមេរិក ក្នុង​ផ្នែកនៃសុន្ទរកថារបស់ខ្លួន បានបញ្ជាក់ជំហររបស់ខ្លួន ជុំវិញ​បញ្ហានុយក្លេអ៊ែរ ដោយ​ខ្លីៗ។ គណៈប្រតិភូនៃសាធារណរដ្ឋឥ​ស្លាមអ៊ីរ៉ង់ ក៏បានបង្ហាញពីជំហររបស់ខ្លួនផងដែរ»។

គួរបញ្ជាក់ថា កិច្ចពិភាក្សាជុំទី១ រវាងសហរដ្ឋអាមេរិក និងអ៊ីរ៉ង់ នៅឯ​រមណីយដ្ឋានតំបន់ជួរភ្នំ​នៃ​ទីក្រុង​ Burgenstock របស់ប្រទេសស្វីស ដែលមានឈ្មោះកិច្ចប្រជុំកំពូល Lake Lucerne Summit បានបញ្ចប់ហើយ​នៅព្រឹកថ្ងៃចន្ទនេះ​។ ការចរចានេះមានគោលបំណងឈានដល់ការបញ្ចប់ជាអចិន្ត្រៃយ៍ ចំពោះ​សង្គ្រាមអ៊ីរ៉ង់​។

តែ​យ៉ាង​ណាក្ដី លោក Baghaei បានពណ៌នាអំពីការផ្លាស់ប្តូរនេះថា «គ្រាន់តែជាការបង្ហាញជំហរ» ដោយពន្យល់ថា វានៅតែ «លឿនពេក» ដែល​មិន​អាច​ពិភាក្សា អំពីកិច្ចព្រមព្រៀងចុងក្រោយ ហើយ «មិនអាចនិយាយបានថា ការចរចា ស្ដី​ពី​បញ្ហានុយក្លេអ៊ែរ បានចាប់ផ្តើមហើយនោះទេ»៕