ប្រធានាធិបតីសហរដ្ឋអាមេរិក លោក Donald Trump បានរិះគន់នាយករដ្ឋមន្ត្រីអង់គ្លេសដែលនឹងចាកចេញពីតំណែង លោក Keir Starmer កាលពីថ្ងៃចន្ទ ទី២២ ខែមិថុនា បន្ទាប់ពីមេដឹកនាំគណបក្សការងាររូបនេះបានប្រកាសថាលោកលាលែងពីតំណែង ដោយនិយាយថា លោកពិតជាបាន «ធ្វើឱ្យខ្លួនឯងរងការលំបាក» ដោយសារតែបញ្ហាថាមពល អន្តោប្រវេសន៍ និងការដោះស្រាយទំនាក់ទំនងរបស់លោកជាមួយទីក្រុងវ៉ាស៊ីនតោន។

លោក Trump បានប្រាប់អ្នកសារព័ត៌មាននៅក្នុងព្រឹត្តិការណ៍មួយនៅការិយាល័យ Oval មុនពេលចោទប្រកាន់លោក Starmer ពីការគ្រប់គ្រងគោលនយោបាយថាមពលរបស់ចក្រភពអង់គ្លេសមិនបានត្រឹមត្រូវ ដោយមិនបានទាញយកផលចំណេញពីប្រេងនៅសមុទ្រខាងជើង និងបានអនុញ្ញាតឲ្យមានទួរប៊ីនខ្យល់នៅគ្រប់ទីកន្លែង។

លោក Trump បាននិយាយថា «ចក្រភពអង់គ្លេស ទិញថាមពលភាគច្រើនរបស់ខ្លួន។ អ្នកដឹងទេថាតើទិញនៅកន្លែងណា? គឺប្រទេសន័រវេស។ អ្នកដឹងទេថាតើន័រវេសទទួលបានប្រេងពីកន្លែងណា? គឺ សមុទ្រខាងជើង»។

«ចក្រភពអង់គ្លេសមានចំណែកដ៍ល្អនៅសមុទ្រខាងជើង ពួកគេមិនចង់ធ្វើវាទេ ដោយសារតែគោលបំណងបរិស្ថាន»។

លោក Trump ដែលបានលើកឡើងពីការចាកចេញរបស់លោក Starmer នៅក្នុងការបង្ហោះសារនៅលើ បណ្តាញសង្គម Truth Social បាននិយាយថា មេដឹកនាំអង់គ្លេសរូបនេះ «ដូចជាមិត្តរបស់ខ្ញុំ» ប៉ុន្តែពុំបានគាំទ្រសហរដ្ឋអាមេរិកឲ្យបានគ្រប់គ្រាន់ទេចំពោះណាតូ និងសង្គ្រាមនៅអ៊ីរ៉ង់។ មេដឹកនាំទាំងពីរ បានប៉ះសម្តីគ្នាជុំវិញការប្រើប្រាស់មូលដ្ឋានយោធាអង់គ្លេសនៅប្រទេសស៊ីបដើម្បីធ្វើការវាយប្រហារនៅអ៊ីរ៉ង់ ដោយមេដឹកនាំអាមេរិកបានសម្តែងការខកចិត្តដែលអង់គ្លេសបានចំណាយពេលយូរពេកក្នុងការអនុម័តសំណើរបស់សហរដ្ឋអាមេរិកក្នុងការប្រើប្រាស់មូលដ្ឋាន RAF Akrotiri នៅប្រទេសស៊ីប ដើម្បីទម្លាក់គ្រាប់បែកលើគោលដៅនៅអ៊ីរ៉ង់។