សហរដ្ឋអាមេរិក បានផ្អាកទណ្ឌកម្មជាបណ្ដោះអាសន្នលើប្រេងរបស់អ៊ីរ៉ង់កាលពីថ្ងៃចន្ទ ទី២២ ខែមិថុនា បន្ទាប់ពីអនុប្រធានាធិបតី លោក JD Vance បាននិយាយថាអ៊ីរ៉ង់ នឹងអនុញ្ញាតឱ្យក្រុមអធិការកិច្ចនុយក្លេអ៊ែររបស់អង្គការសហប្រជាជាតិ វិលត្រឡប់ទៅប្រទេសនេះវិញ បន្ទាប់ពីការចរចានៅប្រទេសស្វីស។

កាលពីសប្តាហ៍មុន ទីក្រុងតេអេរ៉ង់ និងទីក្រុងវ៉ាស៊ីនតោន បានចុះហត្ថលេខាលើអនុស្សរណៈនៃការយោគយល់ ដោយចាក់គ្រឹះសម្រាប់ការចរចាបន្ទាប់ពីការប្រយុទ្ធគ្នារយៈពេលជិត៤០ថ្ងៃ ដែលបន្តមកមានបទឈប់បាញ់ដ៏រង្គោះរង្គើ។

លោក Vance បានប្រាប់អ្នកសារព័ត៌មាននៅរមណីយដ្ឋាន Burgenstock របស់ប្រទេសស្វីស ថា «យើងបានចាក់គ្រឹះដ៏ល្អសម្រាប់កិច្ចព្រមព្រៀងចុងក្រោយដ៏ជោគជ័យ» ហើយ «កិច្ចព្រមព្រៀងចុងក្រោយ គឺលំនៅឋាន ដែលយើងមិនទាន់បានសាងសង់លំនៅឋាននោះនៅឡើយ ប៉ុន្តែយើងបានចាក់គ្រឹះដ៏ជោគជ័យដើម្បីទទួលបានកន្លែងល្អសម្រាប់ប្រជាជនអាមេរិក»។

ដោយឡែក ក្រសួងរតនាគារសហរដ្ឋអាមេរិកបាននិយាយថា ក្រសួងកំពុងដកចេញទណ្ឌកម្មជាបណ្ដោះអាសន្នលើអ៊ីរ៉ង់ ដើម្បីអនុញ្ញាតឱ្យប្រទេសនេះផលិត លក់ និងដឹកជញ្ជូនប្រេងឆៅ និងផលិតផលពាក់ព័ន្ធផ្សេងទៀតរហូតដល់ថ្ងៃទី២១ ខែសីហា។

លោក Scott Bessent រដ្ឋមន្ត្រីក្រសួងរតនាគារសហរដ្ឋអាមេរិកបានលើកឡើងពីការប្តេជ្ញាចិត្តរបស់ទីក្រុងតេអេរ៉ង់ចំពោះ «ការដឹកជញ្ជូនដោយសេរី និងបើកទូលាយ» នៅក្នុងច្រកសមុទ្រ Hormuz និងការអនុញ្ញាតឱ្យក្រុមអធិការកិច្ចរបស់ទីភ្នាក់ងារថាមពលអាតូមិកអន្តរជាតិ (IAEA) ចូលទៅប្រទេសរបស់ពួកគេ ដែលនេះជាហេតុផលសម្រាប់ការផ្អាកទណ្ឌកម្ម។