មនុស្សយ៉ាងហោចណាស់ ១៨ នាក់បានស្លាប់នៅប្រទេសបារាំង រួមទាំងកុមារពីរនាក់ដែលទុកចោលនៅក្នុងរថយន្តក្រោមរលកម្ដៅក្តៅខ្លាំង ខណៈសីតុណ្ហភាពក្ដៅខ្លាំងបានគ្របដណ្ដប់លើទ្វីបអឺរ៉ុប ដោយបំបែកកំណត់ត្រាសីតុណ្ហភាពនៅក្នុងទីក្រុងជាច្រើនកាលពីថ្ងៃចន្ទ។

ខណៈសាលារៀននៅប្រទេសបារាំងបានបិទ ឬកែប្រែកាលវិភាគ ក្រុមអ្នកព្យាករណ៍អាកាសធាតុនៅអង់គ្លេសបានព្យាករណ៍ថាសីតុណ្ហភាពអាចបំបែកកំណត់ត្រាសម្រាប់ខែមិថុនានៅសប្តាហ៍នេះ។

សីតុណ្ហភាពនៅទីក្រុង បដូ (Bordeaux) ក្នុងប្រទេសផលិតស្រាក្រហមភាគខាងលិចរបស់ប្រទេសបារាំងបានកើនឡើងដល់ ៤១,៩ អង្សាសេ ឬ (១០៧,៤ អង្សាហ្វារិនហៃ) ដោយបំបែកកំណត់ត្រាដែលបានកំណត់កាលពីខែសីហាឆ្នាំមុន។ នៅទីក្រុង ព័រយ៉ែ ( Poitiers) ភាគកណ្តាលប្រទេសបារាំង បានឡើងដល់ ៤១,២ អង្សាសេ ដោយលើសពីកំណត់ត្រាខ្ពស់បំផុតកាលពីឆ្នាំ១៩៤៧។

នៅទីក្រុង San Sebastian នៅភាគខាងជើងដែលមានអាកាសធាតុត្រជាក់ជាងគេរបស់ប្រទេសអេស្ប៉ាញ សីតុណ្ហភាពត្រូវបានកំណត់ឡើងដល់ ៤០ អង្សាសេ ដែលច្រើនជាងពីរដងនៃមធ្យមភាគប្រវត្តិសាស្ត្ររបស់ទីក្រុងនេះសម្រាប់ថ្ងៃទី ២២ មិថុនា នេះបើយោងតាម Reuters Climate Monitor ដោយបានបង្ហាញថាទ្វីបអឺរ៉ុបជាទ្វីបដែលនៅឆ្ងាយពីបទដ្ឋានប្រវត្តិសាស្ត្ររបស់ខ្លួនកាលពីថ្ងៃចន្ទ។

ការិយាល័យឧតុនិយម Met ដែលជាអ្នកព្យាករណ៍អាកាសធាតុជាតិរបស់ចក្រភពអង់គ្លេស បាននិយាយកាលពីថ្ងៃចន្ទថា រលកកម្ដៅរយៈពេលបួនថ្ងៃនៅទីនោះអាចជំរុញសីតុណ្ហភាពលើសពី៣៩ អង្សាសេនៅកន្លែងមួយចំនួន ដែលបំបែកកំណត់ត្រាខែមិថុនាចំនួន ៣៥,៦ អង្សាសេដែលបានកំណត់ក្នុងឆ្នាំ១៩៥៧ និង១៩៧៦យ៉ាងងាយ។ ត្រឹមតែប៉ុន្មានសប្តាហ៍មុននេះ ចក្រភពអង់គ្លេសបានបំបែកកំណត់ត្រាសីតុណ្ហភាពខ្ពស់បំផុតរបស់ខ្លួនសម្រាប់ខែឧសភា។

កាលពីថ្ងៃចន្ទដើមសប្ដាហ៍នោះដែរ ប្រទេសអ៊ីតាលី បានចេញការព្រមានពណ៌ក្រហមអំពីរលកកម្ដៅសម្រាប់ទីក្រុងចំនួន១២៕