ក្រុមជម្រើសជាតិអ៊ីរ៉ង់បានបន្សល់ទុកសារមួយនៅក្នុងបន្ទប់ផ្លាស់សម្លៀកបំពាក់ បន្ទាប់ពីបញ្ចប់ការប្រកួតស្មើគ្នា ០-០ ទល់នឹងបែលហ្ស៊ិក ក្នុងជំនួបទី២នៃពូល G នៃព្រឹត្តិការណ៍បាល់ទាត់ពិភពលោកដែលធ្វើឡើងនៅទីក្រុង Los Angeles។

សារដែលសរសេរដោយដៃនោះ ត្រូវបានចែករំលែកជាសាធារណៈដោយសហព័ន្ធបាល់ទាត់អ៊ីរ៉ង់ (FFIRI) ដោយមានខ្លឹមសារថា៖

«ចាប់ពីចក្រភពបុរាណពែរ្សរាប់ពាន់ឆ្នាំមុន រហូតដល់អ៊ីរ៉ង់ស៊ីវិល័យនាពេលបច្ចុប្បន្ន វិញ្ញាណរបស់អ៊ីរ៉ង់នៅតែរស់រវើក និងរឹងមាំជានិច្ច។ យើងបានមកកាន់ទីក្រុង Los Angeles ដោយមោទនភាព ប្រកួតដោយកិត្តិយស និងចាកចេញដោយសេចក្តីថ្លៃថ្នូរ។សូមអរគុណទីក្រុង Los Angeles សម្រាប់ការស្វាគមន៍ដ៏កក់ក្តៅ។ ហើយសូមអរគុណប្រជាជនអ៊ីរ៉ង់គ្រប់រូប ដែលបានផ្តល់បេះដូង សំឡេង និងព្រលឹងរបស់ខ្លួនដល់ប្រទេសជាតិ ក្នុងរយៈពេល ១៨០ នាទីនៃការប្រកួតទាំងពីរ។ សូមឲ្យសន្តិភាព ការគោរព និងមិត្តភាព គ្របដណ្តប់លើប្រទេសទាំងអស់នៅលើពិភពលោក»។

សារនេះក៏បានរំលឹកដល់ហេតុការណ៍វាយប្រហារលើសាលារៀនកុមារីមួយនៅទីក្រុង Minab ដែលបានបណ្តាលឲ្យមនុស្សយ៉ាងហោចណាស់ ១៦៨ នាក់ស្លាប់ នៅថ្ងៃដំបូងនៃសង្គ្រាមផងដែរ។

អ៊ីរ៉ង់បានបើកយុទ្ធនាការ World Cup របស់ខ្លួនដោយប្រកួតស្មើ ២-២ ជាមួយនូវែលសេឡង់ មុនពេលស្មើបែលហ្ស៊ិក 0-0 ក្នុងប្រកួតទី២។ ពួកគេនឹងបន្តជួបអេហ្ស៊ីប ក្នុងការប្រកួតចុងក្រោយនៃវគ្គចែកពូលនៅទីក្រុង Seattle នាថ្ងៃទី ២៨ ខែមិថុនា។

ការចូលរួមរបស់អ៊ីរ៉ង់ក្នុងព្រឹត្តិការណ៍ World Cup លើកនេះ បានជួបបញ្ហាប្រឈមជាច្រើន ដោយសារស្ថានភាពសង្គ្រាមនៅមជ្ឈិមបូព៌ា និងក្តីបារម្ភផ្នែកសន្តិសុខ។ សមាជិកសំខាន់ៗមួយចំនួននៃក្រុមការងារបច្ចេកទេសត្រូវបានបដិសេធទិដ្ឋាការចូលសហរដ្ឋអាមេរិក ខណៈដែល FFIRI ក៏បានអំពាវនាវឲ្យ FIFA គោរពគោលការណ៍អព្យាក្រឹតភាព និងយុត្តិធម៌ បន្ទាប់ពីសិទ្ធិបែងចែកសំបុត្ររបស់ខ្លួនត្រូវបានដកហូតមុនការប្រកួត។

ជាលទ្ធផល អ៊ីរ៉ង់បានផ្លាស់ប្តូរទីតាំងជំរំហ្វឹកហាត់ពីរដ្ឋ Arizona សហរដ្ឋអាមេរិកទៅកាន់ទីក្រុង Tijuana ប្រទេសម៉ិកស៊ិក ហើយត្រូវគោរពតាមការរឹតបន្តឹងការធ្វើដំណើរយ៉ាងតឹងរ៉ឹង។ ក្រុមត្រូវបានអនុញ្ញាតឲ្យចូលទឹកដីអាមេរិកតែមួយថ្ងៃមុនការប្រកួត និងត្រូវចាកចេញវិញនៅថ្ងៃប្រកួតដដែល។

ដោយសារបញ្ហាទាំងនេះ លោក Amir Ghalenoei គ្រូបង្វឹកក្រុមជម្រើសជាតិអ៊ីរ៉ង់ បានលើកឡើងថា ក្រុមរបស់លោកគឺជាក្រុមដែលរងការលំបាកបំផុតនៅក្នុងការប្រកួត World Cup ឆ្នាំនេះ។

ទោះជាយ៉ាងណាលោក Andrew Giuliani នាយកប្រតិបត្តិនៃក្រុមការងារ World Cup របស់សេតវិមាន បានបញ្ជាក់ថា កំពុងមានការពិភាក្សាអំពីការកែសម្រួលកាលវិភាគធ្វើដំណើររបស់អ៊ីរ៉ង់ សម្រាប់ការប្រកួតជាមួយអេហ្ស៊ីបនាពេលខាងមុខ។

សាររបស់ក្រុមជម្រើសជាតិអ៊ីរ៉ង់ ត្រូវបានមើលឃើញថាជាការបង្ហាញពីស្មារតីកីឡា និងការអំពាវនាវឲ្យមានសន្តិភាព ក្នុងអំឡុងពេលដែលស្ថានភាពនយោបាយ និងសន្តិសុខនៅតំបន់កំពុងមានភាពតានតឹង៕ អត្ថបទ៖នាង សុភាវុធ