លោក ជា សុខរិទ្ធ អភិបាលរងខេត្តកំពង់ឆ្នាំង បានបញ្ជាក់នៅថ្ងៃទី២៣ ខែមិថុនា ឆ្នាំ២០២៦ ថា សំណង់ផ្ទះរឹងមាំរបស់ជនជាតិខ្មែរឥស្លាម ដែលសាងសង់រំលោភចូលតំបន់មាត់ទន្លេ និងទន្លេសាប ស្ថិតនៅភូមិកំពង់ត្រឡាចក្រោម ឃុំកំពង់​ត្រឡាច ​ស្រុកកំពង់ត្រឡាច មិនទាន់ត្រូវបានរុះរើចេញនៅឡើយទេ បើទោះបីអាជ្ញាធរបានជូនដំណឹង និងកំណត់ពេល​វេលាឱ្យអនុវត្តក៏ដោយ ដែលគិតមកដល់ពេលនេះមានរយៈពេល១៩ថ្ងៃហើយ។

លោកអភិបាលរងខេត្តបានឱ្យដឹងថា ក្នុងចំណោមសំណង់ដែលត្រូវរុះរើ មានម្ចាស់សំណង់ម្នាក់ទៀតនៅភូមិតាជេស ឃុំតាជេស ស្រុកកំពង់ត្រឡាច បានអនុវត្តតាមការណែនាំរបស់អាជ្ញាធរ ដោយបានរុះរើសំណង់ខុសច្បាប់របស់ខ្លួនចេញវិញបានជាច្រើនភាគរយរួចមកហើយ។​ ប្រសិនបើដល់ថ្ងៃកំណត់ ម្ចាស់សំណង់ដែលសាងសង់រំលោភចូលដីមាត់ទន្លេសាបនៅក្នុងភូមិកំពង់ត្រឡាចក្រោម នៅតែមិនព្រមរុះរើចេញដោយខ្លួនឯងទេ នោះនឹងត្រូវទទួលខុសត្រូវចំពោះមុខច្បាប់។ ចំណែកអាជ្ញាធរមានសមត្ថកិច្ច និងក្រុមការងារពាក់ព័ន្ធ នឹងចាត់វិធានការតាមផ្លូវច្បាប់ ដើម្បីរុះរើសំណង់ខុសច្បាប់ទាំងនោះចេញ និងស្ដារទីតាំងដីមាត់ទន្លេឱ្យវិលត្រឡប់ទៅសភាពដើមវិញ។

ក្នុងនាមតំណាងឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង លោក ជា សុខរិទ្ធ អភិបាលរងខេត្តបានជំរុញអោយអាជ្ញាធរតាមមូលដ្ឋានភូមិឃុំសង្កាត់ទាំងអស់ ត្រូវយកចិត្តទុកដាក់ទទួលខុស ទទួលត្រូវ លើសំណង់រឹងមាំទាំងអស់ ដែលសង់រំលោភចំណីផ្លូវ ចំណីស្ទឹង អូរ ទន្លេ ក៏ដូចជាក្នុងតំបន់ហាមឃាត់នានា។ ដូចករណីនេះ អាជ្ញាធរមូលដ្ឋានភូមិឃុំ បានឆ្លើយថា «មិនបានដឹង» តើម្ចាស់សំណង់សង់នៅពេលណា កន្លែងណា បានជាអាជ្ញាធរមិនដឹង ឬមួយសំណង់នេះសាងសង់តែមួយព្រឹករួច។

អាជ្ញាធរខេត្តកំពង់ឆ្នាំង បានអំពាវនាវឱ្យម្ចាស់សំណង់ទាំងអស់ ដែលបានសាងសង់រំលោភលើដីសាធារណៈ ឬតំបន់ការពារធម្មជាតិ ចូលរួមអនុវត្តតាមការណែនាំរបស់អាជ្ញាធរ ដើម្បីជៀសវាងការប្រឈមមុខនឹងវិធានការច្បាប់ និងរួមចំណែកថែរក្សាធនធានធម្មជាតិ ព្រមទាំងសោភ័ណភាពតំបន់មាត់ទន្លេសាបឱ្យបានគង់វង្ស៕ ដោយ ៖ កាំង ហុងវាស្នា​