អាជ្ញាធរមូលដ្ឋានបានឲ្យ​ដឹង​ថា ការវាយប្រហាររបស់រុស្ស៊ី លើ​ទីក្រុង Kryvyi Rig នៅ​ភាគ​កណ្តាលនៃ​ប្រទេសអ៊ុយក្រែន ដែលជាស្រុកកំណើតរបស់លោកប្រធានាធិបតី Volodymyr Zelenskyy បានសម្លាប់មនុស្សយ៉ាង​ហោចណាស់​ ៣នាក់ ហើយ​យ៉ាង​តិច​ ១៩​នាក់បាន​រង​របួស នៅ​ថ្ងៃអង្គារ (ទី២៣ ខែមិថុនា ឆ្នាំ២០២៦) នេះ​។

ទីក្រុងនេះ ដែលមានទីតាំងនៅ​ចម្ងាយ​ប្រហែល ៨០​គីឡូម៉ែត្រ ពីខ្សែត្រៀមជួរមុខ ត្រូវបានដាក់​គោល​ដៅ​ជាញឹកញាប់ដោយការវាយប្រហាររបស់រុស្ស៊ី ចាប់តាំងពីទីក្រុងមូស្គូបានឈ្លានពានក្នុងខែកុម្ភៈ ឆ្នាំ២០២២​។

លោក Oleksandr Vilkul ប្រធានរដ្ឋបាលយោធារបស់ទីក្រុងនេះ​ បានឲ្យ​ដឹង​នៅលើ Telegram ថា «ទី​កន្លែងហេដ្ឋារចនាសម្ព័ន្ធស៊ីវិលមួយ ត្រូវបានវាយប្រហារ។ ជា​រឿង​សោកស្ដាយ​ណាស់​ មនុស្ស ៣នាក់ត្រូវបានសម្លាប់»។ លោកបានបន្ថែម​ថា មនុស្ស ១៩នាក់ផ្សេងទៀត​បានរងរបួស ក្នុង​នោះ​ «៥នាក់ធ្ងន់ធ្ងរ»។

ចំណែក​លោក Oleksandr Ganzha ប្រធានរដ្ឋបាលយោធាតំបន់ Dnipropetrovsk បានបង្ហោះរូបភាពដែលបង្ហាញពីទីតាំងរង​ការវាយប្រហារ ដោយ​កម្ទេចកម្ទីកំពុងមាន​អគ្គិភ័យ​ឆាប​​ឆេះ និងអគារដែលត្រូវបានបំផ្លាញ។

កងទ័ពអាកាសរបស់ទីក្រុងគីវ បានឲ្យ​ដឹង​ថា រុស្ស៊ីបានបាញ់យានដ្រូន​ចំនួន ១៣៥គ្រឿង ទៅលើ​ប្រទេសអ៊ុយក្រែន ពេញមួយយប់ ដែលក្នុងនោះ ១១៨​គ្រឿង ត្រូវបានបាញ់ទម្លាក់៕