យោងតាមប្រព័ន្ធផ្សព្វផ្សាយផ្លូវការ បាន​ឲ្យ​ដឹង​ មេដឹកនាំកូរ៉េខាងជើង លោក​ គីម ជុងអ៊ុន បានរិះគន់ប្រទេស​ជប៉ុនថា កំពុងប្រែក្លាយទៅជា «រដ្ឋសង្គ្រាម» នៅក្នុងសុន្ទរកថា អំឡុងកិច្ចប្រជុំរយៈពេល ៣ថ្ងៃ ដែលបានបញ្ចប់កាល​ពី​ថ្ងៃចន្ទ (ទី២២ ខែមិថុនា ឆ្នាំ២០២៦)។

ទីភ្នាក់ងារសារព័ត៌មានមជ្ឈិម​កូរ៉េ (KCNA) បានរាយការណ៍នៅថ្ងៃទី២៣ ខែមិថុនានេះ​ថា៖ «ជប៉ុន ដែលជាប្រទេសរង​បរាជ័យ នៅតំបន់​អាស៊ី បានប្រែក្លាយខ្លួនទៅជារដ្ឋសង្គ្រាមដោយបើកចំហ ដោយយកកាលៈទេសៈដ៏គួរឲ្យ​ព្រួយបារម្ភនាពេល​បច្ចុប្បន្ន ជាឱកាស ដើម្បីលុប​បំបាត់​ឧបសគ្គទាំងអស់ដែលរឹតត្បិតចំណាត់​ការ​របស់ខ្លួនឲ្យ​ក្លាយជាមហាអំណាចយោធា»។

នៅក្នុងសុន្ទរកថាបញ្ចប់ក្នុងអំឡុងពេលនៃ​កិច្ចប្រជុំរបស់​បក្សកាន់អំណាច លោក គីម បានបន្ថែមថា «ទង្វើ​នេះកំពុងធ្វើ​ឲ្យ​មានប្រតិកម្មខ្លាំង និងក្ដី​បារម្ភយ៉ាងធ្ងន់ធ្ងរ ពីសហគមន៍អន្តរជាតិ»។

គេគេជឿថា នេះ​គឺ​ជាលើកដំបូងហើយ ដែលមេដឹកនាំ​កូរ៉េខាង​ត្បូង​រូប​នេះ បានលើកឡើងពី «ចំណាត់ការ ដើម្បីក្លាយជាមហាអំណាចយោធា» និង «យោធានិយម» ដើម្បី​រិះគន់ប្រទេស​ជប៉ុន។

នៅទីក្រុងតូក្យូ រដ្ឋ​មន្ត្រី​ទទួល​បន្ទុក​ទីស្ដីការ​គណៈរដ្ឋមន្ត្រីជប៉ុន លោក Minoru Kihara បានបដិសេធមិនធ្វើអត្ថាធិប្បាយអ្វី​ឡើយ ជុំវិញ​ការកត់សម្គាល់របស់លោក គីម នេះ​ ប៉ុន្តែបាននិយាយថា គោលនយោបាយ «ផ្តោតលើការការពារជាតិទាំងស្រុង» របស់ជប៉ុន នៅតែមិនផ្លាស់ប្តូរ ហើយថា ចំណាត់​ការ​នោះ​រក្សាតែសមត្ថភាពអប្បបរមាចាំបាច់ ដើម្បី​ការពារខ្លួនប៉ុណ្ណោះ៕