ដងផ្លូវនៅក្នុងទីក្រុង Nante រងការកម្លោចកាលពីថ្ងៃចន្ទ ពេលដែលរលកកម្តៅខែមិថុនា បានបំបែកកំណត់ត្រានៅទីក្រុងភាគខាងលិចប្រទេសបារាំងមួយនេះ ជាទីដែលសីតុណ្ហភាពបានកើនឡើងរហូតដល់ ៤១,៧អង្សាសេ ។

យោងតាមការអះអាងរបស់សេវាកម្មអាកាសធាតុ Meteo France បានឲ្យដឹងថា អាកាសធាតុក្តៅខ្លាំងបែបនេះ ត្រូវបានគេរំពឹងថា នឹងបន្តនៅក្នុងទីក្រុង Nantes ក្នុងនោះសីតុណ្ហភាពអតិបរមា ត្រូវបានគេព្យាករថានឹងកើនឡើងដល់ ៤២អង្សាសេ ឬ ៤៣អង្សាសេ ។

អ្នកស្រុកនៅក្នុងមជ្ឈមណ្ឌលថែទាំមនុស្សចាស់ជរា ស្ថិតក្នុងសង្កាត់ Les Sorinieres ត្រូវការស្នាក់នៅក្នុងបន្ទប់មានម៉ាស៊ីនត្រជាក់ ។ មនុស្សចាស់ងាយរងគ្រោះខ្លាំងជាងគេ អំឡុងរលកកម្តៅបែបនេះ ជាពិសេសនៅតាមស្ថាប័នដែលបន្ទប់គ្មានម៉ាស៊ីនត្រជាក់ ។

សេវាកម្ម Meteo France បន្តថា តំបន់ជាច្រើនរបស់បារាំង បានស្ថិតក្រោមការប្រកាសអាសន្នពីអាកាសធាតុក្តៅធ្ងន់ធ្ងរ ហើយជួបសីតុណ្ហភាព ៤០អង្សាសេនៅថ្ងៃអង្គារនេះ ។ សីតុណ្ហភាពអាចនឹងកើនឡើងដល់ ៤៣អង្សាសេផងដែរ តាមតំបន់មួយចំនួនននៅភាគខាងលិចប្រទេសបារាំង ៕