បុគ្គលិកទាំងឡាយបែកញើសដោយសារកម្ដៅខ្លាំង ហើយសិស្សានុសិស្សបានស្នាក់នៅផ្ទះកាលពីថ្ងៃអង្គារ២៣មិថុនាសប្ដាហ៍នេះ ខណៈរលកកម្ដៅដើមរដូវក្តៅបានគ្របដណ្ដប់លើទ្វីបអឺរ៉ុបភាគច្រើន ដោយប្រទេសបារាំងកំពុងរងគ្រោះពីថ្ងៃក្ដៅបំផុតមិនធ្លាប់មាន។

សាលារៀន និងកន្លែងទេសចរណ៍បានបិទទ្វារមុនម៉ោងកំណត់ ហើយការធ្វើដំណើរតាមរថភ្លើងត្រូវបានលុបចោល ខណៈប្រទេសជាច្រើនបានចេញការព្រមានពណ៌ក្រហមសម្រាប់ទឹកដីភាគច្រើនរបស់ពួកគេក្នុងពេលរលកកម្ដៅដ៏ក្ដៅបំផុតមិនធ្លាប់មាន។ទីភ្នាក់ងារអាកាសធាតុជាតិនិយាយថា ប្រទេសបារាំងមានថ្ងៃក្ដៅបំផុតចាប់តាំងពីការកត់ត្រាបានចាប់ផ្តើមនៅឆ្នាំ ១៩៤៧ បន្ទាប់ពីយប់ក្ដៅបំផុតមិនធ្លាប់មានត្រូវបានកត់ត្រា។

សូចនាករសីតុណ្ហភាពជាតិ បង្ហាញថាសីតុណ្ហភាពជាមធ្យមពេលថ្ងៃ និងពេលយប់នៅទូទាំងស្ថានីយចំនួន ៣០ បានឡើងដល់២៩,៨ អង្សាសេ នេះបើយោងតាមទិន្នន័យបណ្ដោះអាសន្នរបស់ឧតុនិយមបារាំង។ ក្រុមអ្នកវិទ្យាសាស្ត្របានបង្ហាញថា រលកកម្ដៅដដែលៗគឺជាសញ្ញាច្បាស់លាស់នៃការឡើងកម្ដៅផែនដី ហើយព្រមានថារលកកម្ដៅទាំងនោះនឹងកាន់តែញឹកញាប់ យូរជាង និងខ្លាំងជាងនេះ ដែលបណ្តាលមកពីការដុតឥន្ធនៈហ្វូស៊ីលរបស់មនុស្ស។

ស្ទើរតែគ្រប់តំបន់ទាំងអស់នៃប្រទេសអេស្ប៉ាញស្ថិតនៅក្រោមការព្រមានអំពីកម្ដៅ ដោយផ្នែកខ្លះនៃភាគខាងត្បូង និងខាងជើងប្រទេសនេះ ស្ថិតក្នុងកម្រិតព្រមានខ្ពស់បំផុតសម្រាប់ "គ្រោះថ្នាក់មិនធម្មតា" នេះបើយោងតាមទីភ្នាក់ងារអាកាសធាតុជាតិ AEMET។ នៅទីក្រុងម៉ាឌ្រីដ សីតុណ្ហភាពឡើងដល់ ៣៨អង្សាសេ។

នៅប្រទេសអង់គ្លេសវិញ សាលារៀនរាប់សិបកន្លែងបាននិយាយថា ពួកគេនឹងបិទទ្វារមុនម៉ោងកាលពីថ្ងៃអង្គារ ហើយនឹងបន្តបិទរយៈពេលពីរថ្ងៃទៀត។

ទីភ្នាក់ងារអាកាសធាតុរបស់អង់គ្លេសបានចេញការព្រមានពណ៌ក្រហមអំពីការឡើងកម្ដៅដ៏កម្រមួយលើកទីពីរ សម្រាប់ផ្នែកខ្លះនៃភាគកណ្តាល និងភាគខាងត្បូងនៃប្រទេសអង់គ្លេសនៅថ្ងៃពុធ និងថ្ងៃព្រហស្បតិ៍សប្ដាហ៍នេះ ហើយសីតុណ្ហភាពអាចឡើងដល់ ៤០អង្សាសេ ខណៈចាត់វិធានការទប់ទល់នឹងរលកកម្ដៅនេះ ។

ប្រទេសអូទ្រីស ប៉ូឡូញ ហុងគ្រី និងក្រូអាអាតបានចេញការព្រមានពីកម្ដៅសម្រាប់ផ្នែកខ្លះនៃទឹកដីរបស់ពួកគេ។ សេវាសង្គ្រោះបន្ទាន់នៅប្រទេសហុងគ្រី និងស្លូវេនី បានរាយការណ៍ថា មនុស្សចាស់កំពុងស្វែងរកជំនួយ៕