ភ្នំពេញ៖ ប្រទេស​កម្ពុជា អាចនាំចេញកសិផលចំនួន ៦មុខទៅកាន់ប្រទេសចិនឆ្លងកាត់តាមប្រទេសឡាវដោយអាច​ចំណាយពេលលឿនជាងមុន។ ការនាំចេញកសិផលតាម​ផ្លូវថ្មីនេះ នឹងកាន់តែលឿនរហ័សជាងមុនដោយចំណាយពេលជាង១០ថ្ងៃ មកត្រឹមមួយសប្តាហ៍ប៉ុណ្ណោះ។

កម្ពុជា និងឡាវ កាលពីថ្ងៃទី២២ មិថុនា ឆ្នាំ២០២៦ បាន​សម្ពោធបើកច្រករបៀងឆ្លងកាត់ផ្លូវគោកថ្មីសម្រាប់ការនាំចេញកសិផលខ្មែរ​ចំនួន ៦ មុខ ទៅកាន់ប្រទេសចិនឆ្លងកាត់តាមប្រទេសឡាវ។

 ឯកឧត្តម ឌិត ទីណា រដ្ឋមន្រ្តីក្រសួង​កសិកម្ម រុក្ខាប្រមាញ់ និងនេសាទ បានសរសេរនៅបណ្តាញសង្គមថា ឯកឧត្ត មានកិត្តិយសចូលរួមសម្ពោធជាផ្លូវការនៃការដឹកជញ្ជូនកសិផលឆ្លងកាត់ (Transit) ពីកម្ពុជា ទៅកាន់ទីផ្សារប្រទេសចិន ដោយឆ្លងកាត់ប្រទេសឡាវ។ នេះគឺសមិទ្ធផលកើតចេញពីកិច្ចខិតខំប្រឹងប្រែង និងការចរចាយ៉ាងសកម្មកន្លងមកនេះ រវាងក្រសួងកសិកម្ម រុក្ខាប្រមាញ់ និងនេសាទ និងក្រសួងកសិកម្ម និងបរិស្ថានឡាវ ដើម្បីបើកផ្លូវ និងសម្របសម្រួលនីតិវិធីនានា ក្នុងការបើកច្រកថ្មីសម្រាប់ការដឹកជញ្ជូនឆ្លងកាត់កសិផលខ្មែរចំនួន ៦មុខ ទៅកាន់ទីផ្សារចិន ដែលរួមមាន ចេក ស្វាយ អង្ករ មៀនប៉ៃលិន ម្សៅដំឡូងមី និងទុរេន។

ឯកឧត្តម មានប្រសាសន៍ថា៖ «នេះជាសញ្ញាណវិជ្ជមាន និងជាកាលានុវត្តភាពថ្មីស្រឡាងសម្រាប់បងប្អូនកសិករ ក៏ដូចជា ម្ចាស់អាជីវកម្មក្នុងវិស័យកសិកម្មនៅកម្ពុជា ក្នុងការចាប់យកឱកាស និងពង្រីកសក្តានុពលកសិផលខ្មែរនៅលើទីផ្សារអន្តរជាតិ»។

 លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម- សេដ្ឋកិច្ច បានឱ្យដឹងថា ការបើកច្រករបៀងថ្មីនេះ នឹងនាំឱ្យកសិផលកម្ពុជាដឹកជញ្ជូនទៅចិន កាន់តែងាយស្រួល លឿនរហ័សជាងមុន ព្រោះអាចដឹកជញ្ជូនតាមរថភ្លើងល្បឿនលឿនរបស់ឡាវទៅកាន់ប្រទេសចិន​ ហើយ ការចំណាយលើថ្លៃដឹកជញ្ជូនក៏កាន់តែទាប ជាពិសេស ជួយ​កាត់បន្ថយនីតិវិធីស្មុកស្មាញកាន់តែច្រើន សម្រាប់ការនាំចេញ។​

សូមបញ្ជាក់ថា ការដឹកជញ្ជូនកសិផលសម្រាប់នាំចេញទៅកាន់ទីផ្សារចិនតាមច្រករបៀងឆ្លងកាត់ផ្លូវគោកថ្មីនេះ បានជួយកាត់បន្ថយពេលវេលាដឹកជញ្ជូនយ៉ាងច្រើនពីជាង១០ថ្ងៃមកត្រឹមមួយសប្តាហ៍ប៉ុណ្ណោះ ហើយ ទន្ទឹមនឹងការសម្ពោធបើកច្រករបៀងនាំចេញកសិផលឆ្លងកាត់ផ្លូវគោកថ្មីនេះ កម្ពុជា​ក៏បានដឹក​ជញ្ជូនទុរេនស្រស់ចំនួន ៤កុងតឺន័រ ឆ្ពោះទៅកាន់ទីផ្សារប្រទេសចិន ផងដែរ៕អត្ថបទ៖ ធូ វិរៈ