ប្រធានាធិបតីអ៊ីរ៉ង់លោក Masoud Pezeshkian បានថ្លែងនៅក្នុងសន្និសីទសារព័ត៌មានរួមគ្នាជាមួយនាយករដ្ឋមន្ត្រីប៉ាគីស្ថាននៅទីក្រុងអ៊ីស្លាម៉ាបាដ កាលពីថ្ងៃអង្គារ ទី២៣ ខែមិថុនា ថា បញ្ហាមីស៊ីលរបស់ប្រទេសអ៊ីរ៉ង់ ពុំមាននៅក្នុងអនុស្សរណៈនៃការយោគយល់ដែលត្រូវបានចុះហត្ថលេខាជាមួយសហរដ្ឋអាមេរិកទេ ហើយវា «នឹងពុំមានឡើយ» ។

លោក Pezeshkian បាននិយាយបន្ថែមថា អ៊ីរ៉ង់នឹងមិនចរចាអំពីសមត្ថភាពការពារជាតិរបស់ខ្លួនជាមួយប្រទេសណាមួយឡើយ ហើយជឿជាក់យ៉ាងមុតមាំថា សន្តិភាព និងស្ថិរភាពក្នុងតំបន់ អាចឈានដល់តែតាមរយៈការពិភាក្សាដោយស្មោះត្រង់ និងកិច្ចសហប្រតិបត្តិការក្នុងតំបន់ប៉ុណ្ណោះ។

លោក Masoud Pezeshkian ប្រធានាធិបតីអ៊ីរ៉ង់ បានជួបជាមួយនាយករដ្ឋមន្ត្រីប៉ាគីស្ថាន លោក Shehbaz Sharif កាលពីថ្ងៃអង្គារ បន្ទាប់ពីបានឈប់ចតនៅរដ្ឋធានីអ៊ីស្លាម៉ាបាដ។

ប្រទេសប៉ាគីស្ថាន និងប្រទេសកាតា បានជួយសម្របសម្រួលការចរចារវាងទីក្រុងតេអេរ៉ង់ និងទីក្រុងវ៉ាស៊ីនតោនឈានទៅរកការបញ្ចប់សង្គ្រាមជាអចិន្ត្រៃយ៍នៅតំបន់មជ្ឈិមបូព៌ា។

នៅឯរមណីយដ្ឋានភ្នំ Buergenstock របស់ប្រទេសស្វីស សហរដ្ឋអាមេរិក និងអ៊ីរ៉ង់ ក៏បានព្រមព្រៀងគ្នាលើយន្តការមួយ ដើម្បីបញ្ចប់ការប្រយុទ្ធរវាងអ៊ីស្រាអែលដែលជាសម្ព័ន្ធមិត្តរបស់សហរដ្ឋអាមេរិក និងក្រុមហេសបូឡាគាំទ្រដោយអ៊ីរ៉ង់នៅក្នុងប្រទេសលីបង់ ព្រមទាំងបានបើកខ្សែទំនាក់ទំនងមួយដើម្បីជួយធានាបានសុវត្ថិភាពសម្រាប់នាវាពាណិជ្ជកម្ម ឆ្លងកាត់ច្រកសមុទ្រ Hormuz ជាផ្លូវទឹកដ៏សំខាន់សម្រាប់ការផ្គត់ផ្គង់ប្រេងសកល ដែលទីក្រុងតេអេរ៉ង់ បានរារាំងក្នុងអំឡុងពេលសង្គ្រាម។