អាជ្ញាធរ​នៃ​ស្ថាប័ន​ការពារដែន​កោះ​ លោក Wellington Koo បាននិយាយនៅថ្ងៃពុធ (ទី២៤ ខែមិថុនា ឆ្នាំ២០២៦) នេះ​ថា យោធារបស់​កោះ​តៃវ៉ាន់ ត្រូវសាកល្បងថា តើខ្លួនអាចឆ្លើយតបបាន​ភ្លាមៗ ចំពោះសង្គ្រាមដែលកំពុងផ្ទុះឡើងដែរ ឬអត់ ខណៈដែលពេលវេលាព្រមាន សម្រាប់ការវាយក្រសោប​ណាមួយដោយ​ប្រទេសចិន គឺកាន់តែ​​ខើចទៅៗហើយ​។

កោះ​តៃវ៉ាន់កំពុងធ្វើសមយុទ្ធ «ត្រៀមខ្លួនប្រយុទ្ធភ្លាមៗ» រយៈពេល ៥ថ្ងៃ នៅសប្តាហ៍នេះ។ យោធារបស់ខ្លួនបានចាប់ផ្តើមរៀប​ចំសមយុទ្ធមួយចំនួនរបស់ខ្លួនផ្អែក​តាម​សេណារីយ៉ូ ដែលចិនបានប្រែក្លាយសមយុទ្ធធម្មតានៅជុំវិញកោះនេះ ទៅជាការវាយប្រហារពិតប្រាកដ។

គួរបញ្ជាក់​ថា ចិនចាត់ទុកតៃវ៉ាន់ ដែលជា​កោះ​ស្វ័យ​គ្រប់គ្រងដោយលទ្ធិ​ប្រជាធិបតេយ្យមួយ​នេះ​ថា ជាទឹកដីរបស់ខ្លួន ហើយយោធារបស់ប្រទេស​នេះ​ធ្វើប្រតិបត្តិការនៅជុំវិញកោះនេះស្ទើររាល់ថ្ងៃ។ នាវាផ្ទុកយន្តហោះថ្មីបំផុតរបស់ចិន បានធ្វើដំណើរឆ្លងកាត់ច្រកសមុទ្រតៃវ៉ាន់កាល​ពី​ថ្ងៃទី២៣ ខែមិថុនា។

លោក Koo បានប្រាប់អ្នកសារព័ត៌មាននៅសភាថា សមយុទ្ធនេះបានផ្ដោត​កាន់តែខ្លាំងទៅលើសមត្ថភាពក្នុងការឆ្លើយតបយ៉ាងឆាប់រហ័ស និងផ្លាស់ប្តូរយ៉ាងឆាប់រហ័សទៅជាការត្រៀមខ្លួនប្រយុទ្ធ។ លោកបានបញ្ជាក់ថា៖ «វាមានបំណងបង្កើត​នូវ​ល្បឿនដែលយើងជឿថា ចាំបាច់សម្រាប់ការបំលែងពីស្ថានភាពសន្តិភាពទៅជាស្ថានភាពសង្គ្រាម​។ ម្យ៉ាងវិញទៀត ដោយសារស្ថានភាពគំរាមកំហែងបច្ចុប្បន្នពីគូអរិ​ ហើយដោយសារយើងជឿថា ពេលវេលាព្រមានកំពុងតែ​រួញ​ខ្លីទៅៗ យើងត្រូវផ្ទៀងផ្ទាត់ថា យើងអាចឆ្លើយតបបាន​ភ្លាម​ៗ​»។

កោះ​តៃវ៉ាន់ធ្វើសមយុទ្ធយោធាជាប្រចាំ រួមទាំងនៅដើមខែមិថុនា នៅពេលដែលខ្លួនបានបាញ់ប្រព័ន្ធរ៉ូកែត HIMARS ថ្មីផលិតដោយសហរដ្ឋអាមេរិក ចូលទៅក្នុងច្រកសមុទ្រតៃវ៉ាន់។ អំឡុង​ពេល​និយាយ​ នៅឯ​ទីក្រុងប៉េកាំង នា​ថ្ងៃទី២៤ ខែមិថុនានេះ​ លោកស្រី Zhang Han អ្នកនាំពាក្យការិយាល័យទទួល​បន្ទុក​កិច្ចការកោះ​តៃវ៉ាន់របស់ប្រទេសចិន បានលើកឡើង​ថា សមយុទ្ធទាំងនេះបានបង្ហាញពី «ចេតនាអាក្រក់» របស់គណបក្សប្រជាធិបតេយ្យជឿនលឿន (DPP) ដែលកំពុងកាន់អំណាច ក្នុង​ការ​ស្វែងរកឯករាជ្យដោយកម្លាំង៕