នៅថ្ងៃអង្គារ (ទី២៤ ខែមិថុនា ឆ្នាំ២០២៦) នេះ ប្រទេស​រុស្ស៊ី បានលើក​ឡើង​ថា សហរដ្ឋអាមេរិកលែងជា «អ្នកសម្រុះសម្រួលដែលមិន​លម្អៀង​» ទៀតហើយ នៅ​ក្នុងកិច្ចប្រឹងប្រែង ដើម្បីជួយ​សម្របសម្រួលបញ្ចប់សង្គ្រាមអ៊ុយក្រែន ខណៈដែលខ្លួនបានរិះគន់ផែនការរបស់អឺរ៉ុប ក្នុងការជំរុញការចំណាយ លើវិស័យការពារជាតិ។

កិច្ចពិភាក្សាដឹកនាំដោយសហរដ្ឋអាមេរិក ស្ដីអំពី​ការបញ្ចប់ជម្លោះដ៏អាក្រក់បំផុត​របស់តំបន់អឺរ៉ុប គិត​ចាប់តាំងពីសង្គ្រាមលោកលើកទី២ នៅតែជាប់គាំង ខណៈដែលប្រធានាធិបតី លោក Donald Trump បានបង្វែរ​ការយកចិត្តទុកដាក់របស់លោក​ទៅកាន់មជ្ឈិមបូព៌ាវិញ​ បន្ទាប់ពីបានបញ្ជាឲ្យ​វាយប្រហារអ៊ីរ៉ង់ កាលពី​ចុងខែកុម្ភៈ។

នៅថ្ងៃអង្គារនេះ រដ្ឋមន្ត្រីការបរទេសរុស្ស៊ី លោក Sergei Lavrov បានប្រាប់បេសកជនបរទេសនៅទីក្រុងមូស្គូថា៖ «ចំពោះសហរដ្ឋអាមេរិក ដោយវិនិច្ឆ័យតាម​សកម្មភាពរបស់ពួកគេ ពួកគេហាក់ដូចជាកំពុងបោះបង់ចោលការទាមទារណាមួយ ចំពោះតួនាទីជាអ្នកសម្រុះ​សម្រួលដែលមិន​មានភាព​លម្អៀង​ ហើយជំនួសមកវិញ កំពុងបន្តដំណើរការដាក់សម្ពាធទណ្ឌកម្មកាន់តែខ្លាំងឡើងលើរុស្ស៊ី»។

នៅឯ​​កិច្ចប្រជុំកំពូលនៃ​ប្រទេសមាន​ឧស្សហកម្ម​លូត​លាស់​ទាំង៧ (G7) ក្នុង​ប្រទេសបារាំង កាលពីដើមខែនេះ មេដឹកនាំនានា រួមទាំងលោក Trump ផងដែរ បានយល់ព្រមបង្កើនសម្ពាធ លើ «សេដ្ឋកិច្ចអំណោយ​ផល​ដល់​សង្គ្រាម» របស់រុស្ស៊ី ដោយពង្រឹងទណ្ឌកម្ម រួមទាំងលើថាមពលផងដែរ។

​ជាមួយ​គ្នា​នេះ អំឡុង​ពេល​ថ្លែងដាច់​ដោយឡែកពីគ្នា នា​ថ្ងៃអង្គារនេះដែរ​ ប្រធានាធិបតីរុស្ស៊ី លោក Vladimir Putin បាននិយាយថា អឺរ៉ុបកំពុងរៀបចំខ្លួនដោយ​បើក​ចំហ ដើម្បីមាន​​សង្គ្រាម តាមរយៈកម្មវិធីបង្កើន​អាវុធឡើង​វិញ​ដ៏ធំរបស់ខ្លួន ដែលត្រូវបានជំរុញដោយលោក Trump៕