ប្រធានាធិបតីអ៊ុយក្រែន លោក Volodymyr Zelenskyy កាលពីថ្ងៃអង្គារ ទី ២៣ ខែមិថុនា បានសរសើរកងកម្លាំងវាយប្រហាររបស់ប្រទេសលោក និងបាននិយាយថាសម្ពាធរបស់ពួកគេកំពុងធ្វើឱ្យពលរដ្ឋរុស្ស៊ីសួរសំណួរអំពីសង្គ្រាមដែលនៅបន្ត។

លោកបានធ្វើអត្ថាធិប្បាយបែបនេះនៅក្នុងសុន្ទរកថាមួយ បន្ទាប់ពីយោធាអ៊ុយក្រែនបាននិយាយថា ខ្លួនបានវាយប្រហារទីតាំងថាមពល និងស្ពានផ្លូវរថភ្លើងដ៏សំខាន់មួយកន្លែងនៅឧបទ្វីបគ្រីម៉េ កាន់កាប់ដោយរុស្ស៊ី។

លោក Zelenskyy ក៏បាននិយាយផងដែរថា វាសំខាន់ខ្លាំងក្នុងការមានទំនាក់ទំនងជាមួយប្រទេសប៉ូឡូញ បន្ទាប់ពីអ៊ុយក្រែន បានបន្ទាបឋានៈតំណាងរបស់ខ្លួននៅឯវេទិកាស្តារឡើងវិញដ៏សំខាន់នៅទីក្រុង Gdansk ប្រទេសប៉ូឡូញ ដោយបញ្ជូននាយករដ្ឋមន្ត្រីជំនួសវិញ។

ការសម្រេចចិត្តរបស់លោក Zelenskyy ក្នុងការខកខានព្រឹត្តិការណ៍នេះ បានកើតឡើងបន្ទាប់ពីជម្លោះរវាងអ៊ុយក្រែន និងប៉ូឡូញ ជុំវិញប្រវត្តិសាស្ត្រសតវត្សរ៍ទី២០។

ការមិនចុះសម្រុងចុងក្រោយ កើតឡើងបន្ទាប់ពីប្រធានាធិបតីប៉ូឡូញ លោក Karol Nawrocki បានកាត់ លោក Zelenskyy ចេញពីបញ្ជីបេក្ខជនទទួលគ្រឿងឥស្សរិយយសខ្ពស់បំផុតឥន្ទ្រីសរបស់ប្រទេសប៉ូឡូញ។