កំពង់ចាម ៖​ ប្រធានក្រុមប្រឹក្សាឃុំបឹងណាយនៃស្រុកព្រៃឈរ បានប្តេជ្ញាខិតខំប្រឹងប្រែងបន្តបំរើសេវាសាធារណៈ​ និងប្រើប្រាស់ថវិកាជាតិ​ដោយតម្លាភាព​ដើម្បីកសាងអភិវឌ្ឍន៍នៅមូលដ្ឋានមួយនេះឲ្យកាន់ល្អប្រសើរបន្ថែមទៀត។ 

លោក​​ ហ៊ីម​ ទីន​ ប្រធានក្រុម​ប្រឹក្សា​ឃុំបឹងណាយ​ ស្រុកព្រៃឈរ ខេត្តកំពង់​ចាម​ បានលើកឡើងថា បច្ចប្បន្ន​នៅតាមភូមិទូទាំងឃុំរបស់លោក​ មានប្រព័ន្ធធារាស្ត្រ​ ភ្លើង​ ទឹក​ និងផ្លូវល្អស្អាតហើយ​ ដោយក្រុមប្រឹក្សាឃុំបានឯកភាពគ្នាធ្វើទៅតាមជំហានថវិកាដែលមានជារៀងរាល់ឆ្នាំ។ ជាមួយគ្នានេះក្រុមប្រឹក្សាឃុំ​បឹងណាយ​ បានបន្តគិតគូរពីសុខមាលភាពរបស់ប្រជាពលរដ្ឋតាមខ្នងគ្រួសារដែលមានជីវភាពខ្វះខាតផងដែរ។ សម្រាប់​រដ្ឋបាលឃុំសណ្តែកនៅអាណត្តិថ្មី​ ក៍បានយកថវិកាជាតិដែលទំលាក់មកប្រើប្រាស់ ​ដើម្បីការអភិវឌ្ឍន៍កែប្រែល់ហេដ្ឋារចនាសម្ពន្ធ័ជាពិសេសផ្លូវថ្នល់​ ដែលជាសសៃឈាមចរន្តសេដ្ឋកិច្ច។ 

ទន្ទឹម​នឹង​នេះ​ដែរ​ លោក​​ ហ៊ីម​ ទីន បានបន្តប្តេជ្ញាចិត្តបំពេញតួនាទីភារកិច្ចបំរើសេវាសាធារណៈ​មិនថាថ្ងៃសៅរ៍ឬអាទិត្យឡើយ​ ដោយបានដាក់វេនគ្នាប្រចាំការជានិច្ចទោះថ្ងៃឈប់សម្រាកក៍ដោយ​ ធ្វើយ៉ាងបំរើតម្រូវការជូនប្រជាពលរដ្ឋនៅមូលដ្ឋានលោកឲ្យកាន់តែល្អបន្ថែមទៀត​។

លោក​ ហ៊ីម​ ទីន ប្រធានក្រុម​ប្រឹក្សា​ឃុំបឹងណាយ នៃស្រុកព្រៃឈរ បានបញ្ជាក់ទៀតថា​ ការអភិវឌ្ឍន៍​ក្នុងអាណត្តិលោកកាន់ជាមេឃុំ​ លោកនឹងបន្តស្ថាបនាកសាង​សមិទ្ធផលថ្មីៗជាច្រើនទៀត​ ស្របតាមគោលនយោបាយរបស់រាជរដ្ឋាភិបាលក្នុងនោះរួមមាន៖​ ផ្លូវថ្នល់ដោយកែប្រែពីផ្លូវដីទៅផ្លូវបេតុង​ និងការផ្តល់សេវាឲ្យលឿនរហ័សទាន់ចិត្ត​ ដើម្បីបំពេញតម្រូវការរបស់ប្រជាពលរដ្ឋតាមភូមិ​នីមួយៗ៕ ដោយ ៖ សីហា