ការក្លែងបន្លំ និងកំហុសឆ្គង នៅក្នុងប្រព័ន្ធសុខុមាលភាពរបស់ចក្រភពអង់គ្លេស កំពុងធ្វើឲ្យអ្នកបង់ពន្ធខាតបង់ ១០ពាន់លានផោន (១៣ពាន់លានដុល្លារ) ក្នុងមួយឆ្នាំ។ នេះបើយោងតាមការវិភាគដោយស្ថាប័នឃ្លាំមើលថវិការបស់រដ្ឋាភិបាល។
តួលេខទាំងនេះបានលេចឡើងនៅពេលដែលការប៉ុនប៉ងរបស់អតីតអភិបាលក្រុង Manchester លោក Andy Burnham ក្នុងការជំនួសតំណែងនាយករដ្ឋមន្ត្រី បានបោះជំហានទៅមុខយ៉ាងធំ ដោយសារការលាលែងពីតំណែងរបស់លោក Keir Starmer កាលពីថ្ងៃទី២២ ខែមិថុនា។ ការកាត់បន្ថយការចំណាយផ្នែកសុខុមាលភាព គឺជាអ្វីដែលលោក Starmer បានព្យាយាម និងមិនទទួលបានជោគជ័យ នៅដើមអាណត្តិរបស់លោក បន្ទាប់ពីមានការបះបោររបស់សមាជិកសភារបស់លោក។
លោក Burnham បានប្រាប់សារព័ត៌មាន The Times ថា គោលបំណងរបស់លោក គឺកាត់បន្ថយការចំណាយសុខុមាលភាព ដោយការធ្វើឲ្យអ្នកស្នើសុំទទួលបានការងារ ដោយពិពណ៌នាអំពីវិធីសាស្រ្តនេះថា ជា «ការផ្លាស់ប្តូរឆ្ពោះទៅរករដ្ឋមានផែនការបង្ការកាន់តែច្រើន ដែលធ្វើការវិនិយោគយ៉ាងត្រឹមត្រូវ ដើម្បីគាំទ្រមនុស្សឲ្យធ្វើការ»។
នៅក្នុងរបាយការណ៍និន្នាការសុខុមាលភាពរបស់ខ្លួន ការិយាល័យទទួលខុសត្រូវថវិកា (OBR) បានឲ្យដឹងថា វិក្កយបត្រដែលបង្កឡើងដោយកំហុសឆ្គងផ្នែករដ្ឋបាល និងការស្នើសុំក្លែងក្លាយ បានកើនឡើងយ៉ាងខ្លាំង ក្នុងអំឡុងពេលមានជំងឺរាតត្បាត ប៉ុន្តែបានវិលត្រឡប់ទៅកម្រិតមុនពេលមានជំងឺកូវីដ-១៩ វិញ បន្ទាប់ពីរដ្ឋាភិបាលបានបង្កើនបុគ្គលិក ដើម្បីប្រយុទ្ធប្រឆាំងនឹងការក្លែងបន្លំ។ តែយ៉ាងណាក៏ដោយ ឥឡូវនេះ វាមានចំនួនជិតពាក់កណ្តាលនៃការចំណាយរបស់រដ្ឋាភិបាលលើការដឹកជញ្ជូន។
ប្រទេសអង់គ្លេសបានចំណាយប្រហែល ៣៥០ពាន់លានផោន ក្នុងឆ្នាំ២០២៥ លើសុខុមាលភាពទាំងមូល ជាចំនួនដែលរួមបញ្ចូលទាំងប្រាក់សោធននិវត្តន៍របស់រដ្ឋ ក៏ដូចជាប្រាក់ឧបត្ថម្ភអ្នកអត់ការងារធ្វើ និងជនមានពិការភាព។ ប្រហែល ៣,២ភាគរយនៃការស្នើសុំ ត្រូវបានចាត់ទុកថា ជាការក្លែងបន្លំ ឬបានបង់ដោយមានកំហុសឆ្គង ក្នុងឆ្នាំ២០២៥-២០២៦ ដោយបានកើនឡើងដល់កម្រិតខ្ពស់បំផុត ក្នុងអំឡុងពេលមានជំងឺរាតត្បាត ដោយឡើងដល់ ៤,៣ភាគរយ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
